हामी सबैकाे संसारन्यूज

काठमाडाैं । यातायात व्यवस्था विभागले साउन १ गतेबाटै सबै सवारी साधनमा इम्बोस्ड नम्बर प्लेट अनिवार्य नभएको बताएको छ । मंगलबार एक विज्ञप्ति जारी गर्दै विभागले साउन १ गते बिहानबाट सडकमा गुड्ने सबै सवारी साधनमा इम्बोस्ड नम्बर प्लेट जडान गर्नुपर्ने आशय विभागको नरहेको स्पष्ट पारेकाे छ ।

२०७८ कात्तिक २२ गतेको राजपत्रमा प्रकाशित सूचनाबमोजिम ज-जसले इम्बोस्ड नम्बर अनिवार्य जडान गर्नुपर्ने थियो, ती सवारीमा यस्ता प्लेट जडान भएका छन् वा छैनन भन्ने कुरामा अनुगमन गर्नुपर्ने देखिएको भन्दै विभागले यसअघिको भनाइको बचाउ गरेको छ । विज्ञप्तिको सुरुवातमै माफी मागेको विभागले तत्कालका लागि सबैलाई अनिवार्य गरिएको नभई पहिले नै बाध्यकारी बनाएको सरकारी निकायलगायतलाई मात्रै अनुगमन गर्न खोजिएकाे स्पष्ट पारेको छ ।

विज्ञप्तिमा भनिएको छ, “२०७८ कार्तिक २२ गतेको राजपत्रको सूचना बमोजिम जो जसले इम्बोस्ड नम्बर प्लेट अनिवार्य जडान गर्नुपर्ने थियो, ती सवारीमा यस्ता प्लेट जडान भएका छन् वा छैनन् भन्ने अनुगमन भने गर्नुपर्ने देखियो । सिमित समयमा कार्य पुरा गर्नका लागि आगामी दिनमा यो कार्यको गति तीब्र हुन जरुरी छ, सडकमा गुड्ने सबै सवारीमा साउन १ देखि नै इम्बोस्ड नम्बर अनिवार्य छैन ।”

यसअघि विभागले साउन १ गतेबाटै इम्बोस्ड नम्बर अनिवार्य हुने भन्दै सूचना जारी गरेको थियो । तर, उक्त सूचनाको चौतर्फी विरोध भएपछि विभाग पछि हटेको हो ।

यस्ताे छ विभागकाे विज्ञप्ति