हामी सबैकाे संसारन्यूज

काठमाडौं । राष्ट्र बैंकले विदेशमा आर्जन गरेको रकम स्वदेशमै पठाउन अनुरोध गरेको छ ।

विशेष गरेर विदेशमा बस्ने नेपालीका लागि आकर्षक ब्याजसहित ‘बैदेशिक रोजगार बचतपत्र’ निष्कासन गरेर लगानी गर्न आग्रह गरेको राष्ट्र बैंकले विदेशमा कमाएको पुँजी देशमा लगानी गरी देशको आर्थिक समृद्दिमा हातेमालो गर्न अनुरोध गरेको हो ।

२०७९ जेठ १८ गतेदेखि असार ६ गतेसम्मको समय राखेर निष्कासन गरेको उक्त बैदेशिक रोजगार बचतपत्र अनलाइनमार्फत् फारम भरेर खरिद गर्न सकिनेछ ।

थोरैमा १० हजार र त्यो भन्दा माथि ५० करोडसम्म लगानी गर्न सकिने बताउदै त्यसको बार्षिक व्याजदर १२.५० प्रतिशत दिने राष्ट्र बैंकले जनाएको छ । उक्त लगानीको व्याज बैंकले प्रत्येक महिना खरिदकर्ताको आफ्नै खातामा जम्मा गरिदिने बताएको छ । पाँच वर्षसम्मका लागि दिइने उक्त बचतपत्र बापतको ऋणको ब्याज बैंकले प्रत्येक ६/६ महिनामा जम्मा गरिदिने बैंकका विदेशी मुद्रा व्यवस्थापन विभागका उपनिर्देशक डा.  भागवत आचार्य बताउँछन् ।

‘विगतका वर्षहरुमा जस्तै यो वर्षपनि विदेशमा बस्ने नेपाली र तिनका यहाँ रहेका परिवारले लगानी गर्नसक्ने गरी ‘बैदेशिक रोजगार बचतपत्र’निष्कासन गरेका छौं । उक्त बचतपत्र खरिद गरिदिएर विदेशको कमाई स्वदेशमा पठाइदिन अनुरोध गर्दछौं ।’ डा. आचार्यले भने ।

उनले नेपाल यतिबेला कोरोना महामारी, रसिया र युक्रेनको द्धन्द्ध लगायतका कारण समस्यामा रहेको र विदशी मुद्राको संचिति घटिरहेको, आयात बढिरहेको अवस्थामा विदेशमा बस्ने नेपाली दाजुभाइ दिदीबहिनीले कमाएर पठाएको रेमिट्यान्सले धानिरहेको बताए ।

‘आयातको दायरा कमजोर रहेको स्थितिमा पर्यटन क्षेत्र कोरोनाका कारण खस्किएको र हाल विस्तारै चलायमान हुने अवस्थामा अगाडि बढेको छ । त्यसले विदेशमा बस्ने नेपालीलाई मेरो अनुरोध छ यहाँहरुले कमाएको पैसा औपचारिक च्यानलबाट नेपाल पठाइदिनुहुनेछ ।’डा. आचार्य छन्छन् ।

उनले पछिल्ला समयमा विदेशमा बस्ने नेपालीले दुःख गरेर कमाएको पैसा ऐजेन्टहरुले विभिन्न प्रलोभन देखाएर कोठा–कोठा, क्याम्प, क्याम्प पुगेर संकलन गरेर नेपाली पठाइदिन्छु भन्ने र कतिपयको पैसा लिएर वेपत्ता भएका घटनाहरु धेरै सार्वजनिक हुने गरेकोले दुःख गरेर भएपनि औपचारिक माध्यामबाट रेमिट्यान्स पठाउन आचार्यले अनुरोध गरेका छन् । उनले सरकारले ल्याएको आकर्षक प्याकेजको सदुपयोग गर्न समेत अनुरोध गरेका छन् ।

नेपाल सरकारले साढे १२ प्रतिशत व्याजमा पाँचवर्षसम्म नघट्ने गरी लगानीका लागि अवसर दिएको बताउँदै आचार्यले यस अवसरको भरपुर फाइदा लिन विदेशमा बस्ने नेपालीलाई अनुरोध गरेका छन् । उनले सरकार नै सुरक्षित लगानीको क्षेत्र रहेकोले यसमा कुनै शंका नराखी लगानी गर्न समेत अनुरोध गरेका छन् ।

आचार्यले खाडी क्षेत्रबाट बढी रेमिट्यान्स भित्रने हुनाले त्यहाँ कार्यरत नेपालीहरुले यसमा बढी लगानी गरिरहेको र अमेरिका अष्ट्रेलिया, अफ्रिका लगायतका देशमा रहेका नेपालीहरुले पनि यसमा इच्छा देखाएको अचार्यले जानकारी दिएका छन् ।

https://obss.nrb.org.np/saving/