हामी सबैकाे संसारन्यूज

काठमाडौं । न्याय परिषद्ले न्यायाधीश–वकिल घूस प्रकरणमा छानबिन गर्न तीन सदस्यीय समिति गठन गरेको छ । बुधबार बसेको न्यायपरिषद्‍को बैठकले यस्तो निर्णय गरेको कानुनमन्त्री गोविन्द कोइरालाले जानकारी दिए ।

उनका अनुसार न्याय परिषद् सदस्य रामप्रसाद भण्डारीको संयोजकत्वमा छानबिन समिति गठन गरिएको छ । भण्डारीको संयोजकत्वमा गठित छानबिन समितिमा उच्च अदालत पाटनका कायम मुकायम मुख्य न्यायाधीश महेशप्रसाद पुडासैनी र न्यायाधीश महेश शर्मा पौडेल पनि छन् ।

समितिलाई ४५ दिनभित्र छानबिन गरी प्रतिवेदन बुझाउनु पर्ने समयसीमा तोकिएको छ ।

त्यस्तै, न्यायपरिषद्‍को बैठकले घूस लेनदेनको अडियो प्रकरणमा जोडिएका काठमाडौं जिल्ला अदालतका न्यायाधीश राजकुमार कोइरालालाई कार्यसम्पदानमा रोक लगाएको छ । बैठकले उनीमाथि छानबिन प्रक्रिया पूरा नहुँदासम्म कुनै पनि कार्यसम्पादन गर्न नपाउने निर्णय गरेको हो ।

मंगलबार काठमाडौं जिल्ला अदालतका न्यायाधीश राजकुमार कोइराला र अधिवक्ता रुद्र पोखरेलबीच व्यवसायी इच्छाराज तामाङलाई धरौटीमा छुटाउन १० करोडको डिल भएको अडियो सार्वजनिक भएको थियो । न्यायाधीश र कानुन व्यवसायीबीचकै अडियो सार्वजनिक भएपछि न्याय परिषदको आकस्मिक बैठक बसेको हो ।

घुस डिल प्रकरणमा मुछिएका न्यायाधीश कोइरालाले भने आफूले अनुचित कार्य नगरेको दाबी गरेका छन् । साथै उनले आफ्नाबारे सार्वजनिक भएको समाचारप्रति ध्यानाकर्षण भएको उल्लेख गरेका छन् ।

सम्बन्धित समाचार

१० करोड डिलमा मुछिएका न्यायाधिश कोइराला भन्छन् – ममाथि छानबिन होस्

न्यायाधीश र वकिलबीचको घुस डिल सार्वजनिक, न्यायपरिषद्को आकस्मिक बैठक बस्दै