हामी सबैकाे संसारन्यूज

काठमाडौं । सरकारमा सहभागि मन्त्रीहरु हेरफेर गर्ने निर्णयसँगै एकीकृत समाजवादीभित्र विभाजनको अवस्था देखिएको छ । पार्टी निर्णयलाई मन्त्रीहरुले मान्न अस्वीकार गरेसँगै यस्तो अवस्था देखिएको हो । एकीकृत समाजवादीभत्र सचिवालय कमिटी एकातिर र मन्त्रीहरु अर्कोतिर देखिएका छन् । निर्णय गराइसकेका अध्यक्ष माधवकुमार नेपाल निर्णय कार्यान्वयन नभएसँगै अप्ठ्यारोमा परेका छन् ।

बताइअनुसार मन्त्रीहरुलाई मनाउन अध्यक्ष नेपालले गरेका पटक–पटकका छलफल अर्थहिन बनिरहेका छन् । गत शुक्रबार मन्त्रीहरुलाई मनाउन अध्यक्ष नेपालले आफ्नै निवास कोटेश्वरमा बैठक बोलाएका थिए । तर, कोटेश्वर बैठकमा सहभागि मन्त्रीहरुले फिर्ता हुने पार्टी निर्णयप्रति कडा आपत्ति जनाए ।

बताइएअनुसार मन्त्री फेर्ने निर्णयप्रति अध्यक्ष माधव निकट नै भनिएकी सहरी विकासमन्त्री रामकुमारी झाँक्री र स्वास्थ्यमन्त्री विरोध खतिवडाले तिव्र आपत्ति जनाएका थिए । उनीहरुले विना कारण हटाउने निर्णय गर्दा आफुँहरुसँगै पार्टीको प्रतिष्ठा पनि धुलिसात हुने बताएका थिए । मन्त्री झाँक्रीले “बल्ल काम सुरु भएको भन्दै हट्न नमिल्ने” स्पष्ट पारेकी थिइन् ।

अधिकांश मन्त्रीहरुले फिर्ता हुन अस्वीकार गरेको भएपनि केहीले सर्तसहित फिर्ता हुन तयार रहेको बुझिएको छ । मन्त्रीहरुले अहिले सिफारिस नामहरु फेर्नुपर्ने पनि सर्त राखेका छन् । समानुपातिक र समावेशी अवधारणाअनुसार मन्त्रीमण्डल पुनर्संरचना हुनुपर्ने उनीहरुको माग छ । मन्त्री झाँक्रीले बराबरी हैसियतमै महिला मन्त्री बनाइनुपर्ने माग राखेकी छिन् ।

मन्त्रीहरुले सर्त राखेपछि छलफल भने बिना निष्कर्ष टुंगीएको थियो । अध्यक्ष नेपालले पार्टीमा थप छलफल गरेर निर्णय गर्ने बताएका थिए ।

मन्त्रीहरुलाई देउवाकाे ढाडस

प्रधानमन्त्री शेरबहादुर देउवा नै अहिले मन्त्री हेरफेर गर्ने पक्षमा छैनन् । देउवाले एकीकृत समाजवादीका नेताहरुसँग बजेट अधिवेशन समापन हुनुपर्ने अडान राख्दै आएका छन् । तर, देउवालाई मन्त्री हेरफेर गर्दा एस विभाजित हुनसक्ने चिन्ता रहेको बुझिएको छ । देउवाले गठबन्धनको बैठकमा पनि एसभित्रको विभाजनले सरकारलाई संकटमा ल्याउनसक्ने चिन्ता व्यक्त गरेका थिए ।

देउवाले एसले मन्त्री हेरफेर गर्दा अन्य पार्टीभित्र पनि हेरफेर गर्नुपर्ने दबाब आउने र त्यसले समस्या सिर्जना गर्ने बताइरहेका छन् । अहिले एससँगै सत्ता साझेदार सबै दलमा मन्त्री हेरफेरको विषयमा चर्चा छ । माओवादी केन्द्र र जसपाभित्र यसले थप विवाद जन्माएको छ । देउवा मन्त्रीकै कारण पार्टीहरुभित्र समस्या आउन सक्ने बुझाइअनुसार हेरफेरको पक्षमा नदेखिएको बुझिएको छ ।

एसको निर्णय बाहिरिएसँगै आफुलाई भेट्न पुगेका मन्त्रीहरुलाई पनि देउवाले हेरफेर हुने निर्णय कार्यान्वय नहुने आश्वासन दिएका थिए ।