हामी सबैकाे संसारन्यूज

काठमाडौं । माओवादी केन्द्रको झण्डै एक सातासम्म बसेको केन्द्रीय समितिको तेस्रो बैठक पदाधिकारी चयन गर्न असफल बन्यो । बैठकले पोलिटब्यूरो, वैकल्पिक पोलिटब्यूरो र स्थायी समिति गठन गरेको छ । बैठकले स्थायी समितिलाई पूर्णंता भने दिन सकेको छैन् ।

प्रचण्डले पदाधिकारी र स्थायी समितिबारे टुंगो लगाउन बैठकमा “दुई/चार दिनको समय” माग गरेका छन् । उनले बैठकमा पदाधिकारीमध्ये धेरैको नाम टुंगो लगाएको पनि बताएका थिए ।

“महासचिव र उपमहासचिवको नाम तयार पारेको छु तर, अहिले मलाई पढ्न नलगाउनुस्, दुई/चार दिन समय दिनुस्”, प्रचण्डले बैठकमा भनेका थिए ।

तर, प्रचण्ड निकट नै मानिने स्थायी समिति सदस्य गणेश शाह दुई/चार दिनमै नाम टुंग्याउने विषय सम्भव नभएको बताउँछन् । उनका अनुसार आकांक्षीहरु धेरै भएको कारण व्यवस्थापन सहज छैन ।

“मैंले बुझेअनुसार वरिष्ठ उपाध्यक्ष र एक/दुई जना उपाध्यक्षको नाम टुंगीएको भएपनि अन्यको नाम टुंगीएको छैन्, आकांक्षी धेरै छन्, व्यवस्थापन गर्न सजिलो छैन”, शाहले भनेका छन्, “दुई/चार दिन होइन केही साता लाग्न सक्छ ।”

प्रचण्डले वरिष्ठ उपाध्यक्षको नाम प्रस्ताव गरेको भएपनि उक्त पदमै केहीले असन्तुष्टि जनाएका छन् । नेता मातृका यादवले निरन्तर आफुले वरिष्ठ उपाध्यक्ष पद पाउनुपर्ने माग राख्दै आएका छन् । संसार न्यूृजसँगको कुराकानीमा पनि नेता यादवले नेता नारायणकाजी श्रेष्ठलाई वरिष्ठ उपाध्यक्ष बनाउने विषयमा सहमति नभएको बताए ।

“वरिष्ठ उपाध्यक्षको दाबेदारी म पनि हो, तर अध्यक्ष ज्यूले नारायणकाजी पछि मातृकाको नाम राख्ने भन्नुभएको रहेछ, मेरो सहमति छैन”, उनले भनेका छन् । उनले स्थायी समिति बैठकमा पदाधिकारीबारे आफुले स्पष्ट अडान राख्ने बताएका छन् ।