हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी (राप्रपा) ले पार्टीका चार नेतासँग स्पष्टीकरण सोध्ने भएको छ ।

बुधबार केन्द्रीय कार्यालय धुम्बाराहीमा बसेको केन्द्रीय कार्य सम्पादन समितिको बैठकले पार्टीको नामक दुरुपयोग गरेर छुट्टै भेला गरेको भन्दै दिलनाथ गिरी, दिलविकास राजभण्डारी, श्यामप्रसाद तिमल्सिना र राजाराम श्रेष्ठलाई स्पष्टीकरण सोध्ने निर्णय गरिएको प्रवक्ता मोहन श्रेष्ठद्धारा जारी विज्ञप्तिमा जनाइएको छ ।

‘पार्टीको हित विपरीतका गतिविधि जारी राख्ने, अनधिकृत वार्ता समिति बनाउने र सञ्चारमाध्यममा जथाभावी समाचार प्रकाशन, प्रसारण गर्ने, गराउने कार्यमा संलग्न भएकालाई २४ घन्टाभित्र लिखित स्पष्टीकरण सोध्ने र अनुशासन समितिलाई कारबाहीका लागि सिफारिस गर्ने निर्णय गरिएको छ ।’ विज्ञप्तिमा भनिएको छ ।

त्यस्तै असार २६ गते राप्रपा सम्बद्ध राष्ट्रिय प्रजातान्त्रिक महिला संगठनमा सम्बद्ध महिलाहरुका बीचमा उत्पन्न विवाद र उक्त विवादमा पार्टीका महामन्त्रीद्धय कुन्ती कुमारी शाही र राजेन्द्र गुरुङसमेत जोडेर महामन्त्री शाहीको चरित्र हत्या हुने गरी आएको समाचारप्रति राप्रपाले ध्यानाकर्षण भएको जनाएको छ ।