हामी सबैकाे संसारन्यूज

काठमाडौं । नेपाली कांग्रेसले आगामी प्रदेश तथा प्रतिनिधिसभा निर्वाचनमा पनि सत्ता गठबन्धनमा रहेका दलहरूबीच नै चुनावी तालमेल गर्ने निर्णय गरेको छ। कांग्रेसको केन्द्रीय समितिको बैठकले स्थिर सरकार दिनका लागि गठबन्धनलाई निरन्तरता दिने निर्णय गरेको प्रवक्ता प्रकाशशरण महतले जानकारी दिए ।

कांग्रेसले चुनावी तालमेलका लागि गठबन्धनमा रहेका दलहरूसँग आवश्यक संवाद गरेर थप निष्कर्षमा पुग्ने जनाएको छ । कांग्रेसले आगामी निर्वाचनमा गठबन्धनको बलमा बहुमत ल्याउने लक्ष्य पनि लिएको छ।

“स्थानीय निर्वाचनबाट पहिलो दल बनेको नेपाली कांग्रेसलाई प्रतिनिधिसभा तथा प्रदेशसभाको निर्वाचनमा स्पष्ट बहुमततर्फ लक्षित गराउँदै संविधानको रक्षा लोकतन्त्रको थप सुदृढीकरण गर्दै जनताको समुन्नतिको सपनालाई स्थिर सरकारमार्फत सम्बोधन गर्नका लागि केन्द्रीय कार्यसमितिको यो बैठक सत्ता गठबन्धनसँग संवाद गरी चुनावी तालमेल गरेर अघि बढ्ने निर्णय गर्दछ”, बैठकको निर्णयमा भनिएको छ ।

कांग्रेसले चुनावी तालमेल गर्दा न्यूनतम साझा धारणा निर्माण गर्ने जनाएको छ ।

बैठकको निर्णयमा भनिएको छ, “यसरी गठबन्धनमा रहेका दलहरूका बीचमा तालमेल गर्दा संविधानको कार्यान्वयन, आर्थिक सामाजिक रुपान्तरण र वैदेशिक सम्बन्धलगायतका विषयमा न्यूनतम साझा धारणा निर्माण गर्दै आम नेपाली जनतालाई पाँच वर्षमा स्थिर सरकारमार्फत जनताको जीवनस्तरमा गुणात्मक सुधार ल्याउने स्पष्ट कार्यक्रमको खाकासहित आमनिर्वाचनमा नेपाली कांग्रेस प्रस्तुत हुनु पर्दछ भन्ने ठहर यो बैठक गर्दछ।”

कांग्रेसलेले स्थानीय निर्वाचनमा पाएको सफलता गठबन्धनकै कारणबाट सम्भव भएको पनि निष्कर्ष निकालेको छ ।