हामी सबैकाे संसारन्यूज

काठमाडौ । लुम्बिनी विकास बैंकले दोस्रो कार्यकालको लागि प्रमुख कार्यकारी अधिकृतमा नरेश सिंह बोहरालाई सोमबारदेखि लागु हुने गरी ४ वर्षको पदावधिसहित नियुक्ती गरेको छ ।

बोहोरालाई सोमबार एक कार्यक्रमको आयोजना गरी बैंकले स्वागत गरेको छ । उक्त पदबहाली कार्यक्रममा बैंकका सञ्चालक समितिका मनोनित अध्यक्ष प्रविण कृष्ण श्रेष्ठ, बरिष्ठ नायब प्रमुख कार्यकारी अधिकृत पवन ढकाल, नायब प्रमुख कार्यकारी अधिकृत उमेश रेग्मी, विभागीय प्रमुखहरु, शाखा प्रबन्धकहरु लगायत कर्मचारीहरुको हर्षोल्लासपूर्ण उपस्थिति रहेको थियो ।

नरेश सिंह बोहराले यस बैंकको पहिलो कार्यकालमा उल्लेख्य सफलता हासिल गर्दै बैंकलाई एक उत्कृष्ट बैंकको रुपमा स्थापित गराउन महत्वपूर्ण भूमिका खेलेका थिए ।

उनको कार्यकालमा बैंकको चुक्ता पुँजी २.१० अर्बबाट वृद्धि भएर ३.२८ अर्ब पुगेको छ । बैंकको निक्षेप २२.९६ अर्बबाट बृद्घि भएर ४५.१४ अर्ब पुगेको छ भने बैंकको कर्जा लगानी २२.७५ अर्बबाट वृद्धि भएर ४१.१३ अर्ब पुगेको छ । उनको कार्यकालको ४ बर्षमा बैंकका सेयरधनीहरुलाई कुल ६०.७५ प्रतिशत लाभांश वितरण गरिएको छ । बैंकको निष्कृय कर्जा ३.३४ प्रतिशत बाट घटेर १.६८ प्रतिशत कायम भएको छ भने शाखा सञ्जाल ६५ बाट बढेर सातवटै प्रदेशमा गरी ८६ पुगेको छ ।

बोहराले भारतको अग्रणी इलाहबाद विश्वविद्यालयबाट बि.एस्सी र एम.बि.ए. सम्मको अध्ययन गरेका छन् । उनी विगत २५ बर्षदेखि नेपालको बिभिन्न बैंक तथा वित्तीय संस्थामा काम गर्दै आएका छन् ।

व्यवस्थापन प्रशिक्षार्थीको रुपमा सन् १९९७ मा तत्कालिन नेपाल बंगलादेश बैंकबाट बैंकिङ क्षेत्रमा प्रवेश गरेका बोहोराले माछापुच्छ्रे बैंकमा प्रबन्धकीय तहमा विभागीय प्रमुखको भूमिका समेत निभाएका थिए ।

उनले तत्कालिन युनाइटेड फाइनान्समा महाप्रबन्धक, तत्कालिन नारायणी नेशनल फाइनान्स लिमिटेडमा प्रमुख कार्यकारी अधिकृत, तत्कालिन देवः विकास बैंकमा नायब प्रमुख कार्यकारी अधिकृतको रुपमा पनि कुशलता पूर्वक भूमिका निर्वाह गरिसकेका छन् ।