हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र जनता समाजवादी पार्टी (जसपा)को पार्टी कारबाहीमा परेका डा. बाबुराम भट्टराईबीच मंगलबार एक घण्टाभन्दा बढी छलफल भएको छ। माओवादीको संसदीय दलको कार्यालयमा अध्यक्ष प्रचण्ड र भट्टराईबीच छलफल भएको हो ।

अध्यक्ष प्रचण्ड र भट्टराईबीच यसअघि पनि पटक–पटक उपराष्ट्रपति नन्द बहादुर पुनःको निवासमा छलफल भएको थियो । अध्यक्ष प्रचण्ड भारत भ्रमणबाट फर्किसकेपछि दुईजनाको यो पहिलो भेट हो । जसपाबाट कारबाहीमा पर्नु अघिदेखि नै भट्टराईले नयाँ पार्टी गठन गर्न बाटो खुलाउन प्रधानमन्त्री शेरबहादुर देउवालाई पटक–पटक आग्रह गर्दै आइरहेका थिए ।

भट्टराईसँग सामान्य राजनीतिक भेटघाट भएको र गठबन्धन बनाउने विषयमा छलफल भएको अध्यक्ष प्रचण्डले बताएका छन् । गठबन्धन बनाउने सन्दर्भमा अरु पार्टीसँग पनि कुरा गर्ने सहमति भएको पनि उनले बताए ।

“राजनीतिक भेटघाट हो, अरु त्यस्तो केही छैन । गठबन्धन बनाउने विषयमा छलफल चलिराखेको छ । गठबन्धन बनाउने बारे अरु पार्टीसँग पनि कुरा गरौँ । पर्सिसम्म एउटा टुंगोमा पुग्न सकियो भने राम्रो हुन्छ भन्ने कुरा भयो”, छलफलबारे उनले भनेका छन् ।

अध्यक्ष प्रचण्डले बताएअनुसार भट्टराईले गठबन्धनमा रहीरहने प्रतिबद्धता व्यक्त गरेका छन् । साथै कांग्रेसले आगामी चुनावमा पनि सहकार्य गर्ने गरि गरेको निर्णय सही भएको दुवैको निष्कर्ष छ ।