हामी सबैकाे संसारन्यूज

काठमाडौं । विश्वका अधिकांश भागहरू अहिले मौसम प्रकोपको सामना गरिरहेका छन्। युरोप, अमेरिका र चीन चर्को गर्मीले संकटग्रस्त छन् । विशेषगरि युरोपेल देश फ्रान्स, स्पेन, पोर्चुगललगायत करिब १० देशका जंगलमा आगो नियन्त्रण बाहिर छ । राजनीतिक अस्थिरताबाट गुज्रिरहेको बेलायत गर्मीको लहरले आक्रान्त बनाएको छ ।

मौसमविदले गर्मीले सबै रेकर्ड तोड्ने अनुमान गरेका छन् । स्वास्थ्य अधिकारीहरूले गर्मीका कारण मानिसहरू बिरामी हुने र ज्यानसमेत जाने स्थिति देखिएको भन्दै चिन्ता व्यक्त गरेका छन् । कतिपय देशहरुले गर्मीलाई राष्ट्रिय विपद् पनि घोषणा गरेका छन् ।

बेलायतमा अहिले सहारा मरुभूमिभन्दा बढी गर्मी छ । जसका कारण त्यहाँ कोरोना कालमा जस्तै लकडाउनको अवस्था छ । मानिसहरूलाई घरबाटै काम गर्न भनिएको छ। बेलायतमा पहिलो पटक तापक्रम ४० डिग्री नाघेको मौसम पूर्वानुमान महाशाखाले जनाएको छ । जुन एक सताब्दीकै सबैभन्दा बढी गर्मी समय हो ।

मानवीय क्षति हुन सक्ने चिन्ता

संयुक्त राष्ट्रसङ्घले अत्याधिक गर्मीको बारेमा चिन्ता व्यक्त गरेको छ। सङ्गठनका महासचिव एन्टोनियो गुटेर्रेसले जंगलमा लागेको आगो र गर्मीको लहरका कारण धेरै मानिसहरुको ज्यान जानसक्ने बताएको छ ।
गुटेर्रेसले जीवाश्म इन्धनको प्रयोग छाड्न अपिल पनि गरेका छन् ।

युरोपका १० भन्दा बढी देशमा आगलागी

उच्च तापक्रमसँगै युरोपका १० भन्दा बढी देशमा आगलागीको प्रकोप देखिन थालेको छ । अहिले स्पेनका ३६ स्थानमा जंगलमा आगलागी भएको छ । २२ हजार हेक्टर जङ्गल जलेको छ । दक्षिण-पश्चिम स्पेनमा पारा ४४ डिग्री सेल्सियसभन्दा माथि र देशका बाँकी भागमा ४० डिग्रीसम्म पुगेको छ। हालसम्म देशमा २० वटा आगलागी नियन्त्रणमा आएको छ ।

त्यसैगरि पोर्चुगल उत्तरी क्षेत्रमा रहेको जंगलमा लागेको डढेलोमा परी दुई जनाको मृत्यु भएको छ । १२ हजार एकडभन्दा बढी प्रभावित भएको छ । पोर्चुगलमा एक सातामा तापक्रम ४७ डिग्रीको उचाइमा पुगेको छ, जुन जुलाईमा नयाँ रेकर्ड हो ।

फ्रान्सको दक्षिणपश्चिममा पर्ने हर बोर्डे नजिकैको जंगलमा एक सातादेखि आगो लागेको छ । १४ हजारभन्दा बढी मानिसलाई सुरक्षित स्थानमा सारिएको छ । तापक्रम ३३ डिग्री नाघेको छ । भविष्यमा नयाँ कीर्तिमान कायम हुनेछ।

अमेरिका र चीन पनि संकटमा

अमेरिकामा कुल जनसंख्याको लगभग १७ प्रतिशत गर्मीको चपेटामा छन्। मौसमको अवस्था थप प्रतिकुल हुँदै गएको छ । अमेरिकी राष्ट्रपति जो बाइडेनले देशमा जलवायु संकटकाल लगाउने तयारी गरेका छन् ।

यता चीनको सांघाई लगायतका धेरै सहरहरू चर्को गर्मीको सामना गरिरहेका छन् । गर्मीबाट बच्न मानिसहरु भूमिगत आश्रयस्थलमा सरेका छन् । सांघाई सहित ६८ सहरमा रेड अलर्ट जारी गरिएको छ । सांघाईका २ करोड ५० लाख मानिसलाई गर्मीको लहरबारे सचेत गराइएको छ । एजेन्सीको सहयोगमा