हामी सबैकाे संसारन्यूज

काठमाडाैं । नेकपा (माओवादी केन्द्र)का सांसद गजेन्द्रकुमार महतले एमालेको आर्थिक विभागमा रहेका भनिएका एम अधिकारी खोजीदिन आग्रह गरेका छन् । बुधबार बसेको प्रतिनिधि सभा बैठकमा माओवादी केन्द्रका सांसद गजेन्द्र महतले एम अधिकारी पत्ता लगाउन माग गरेका हुन् ।

‘कुखुराको चल्ला हराएपछि पनि खोजी हुन्छ हाम्रो गाउँघरमा । ठूलो दलको महत्वपूर्ण विभागको केन्द्रीय सदस्य हराएको छ। महत्वपूर्ण मान्छे हराएको छ, कसले खोजिदिने?’, महतले प्रश्न गरे, ‘उनको खोजीको लागि बालुवाटारमा आन्दोलन भइरहेको छ। उनको खोजीका लागि समिति बनेको छैन तर कसले हुन्छ कसरी हुन्छ एम अधिकारी खोजी पाउनुपर्यो।’

जुम्लाका सांसद महतले सरकारले खोजी नगरे त्यो व्यक्तिको खोजी गर्नु सम्बन्धित थरका मान्छेको दायित्व हुने बताए । ‘हाम्रोतिर महत थरको मान्छे हराए महत थरका मान्छेहरूले खोज्छन्, अपुताली खानेको पनि जिम्मा हुन्छ । एम अधिकारी खोज्ने जिम्मा सरकारले नगरेपनि अधिकारी थरकाले खोज्नुपर्‍यो,’ महतले भने ।

त्यस्तै, सांसद दिल कुमारीले राजीनामा गरेर एमालेको संगठन विस्तारमा लाग्न गभर्नर महाप्रसाद अधिकारीलाई सुझाव दिएकी थिइन् । ‘राष्ट बैंकको गभर्नरबारे कानूनी र नैतिकताको प्रश्न उठेपछि राजीनामा गरेर एमालेको संगठन बलियो बनाउन लाग्नुस्,’ सांसद कुमारीले भनिन् ।