Sansar News
काठमाडाैं । श्रीलंकाका कार्यबहाक राष्ट्रपति रनिल विक्रमासिंघे राष्ट्रपतिमा निर्वाचित भएका छन् । उनी सन् २०२४ सम्म पदमा रहनेछन् ।
राष्ट्रपति पदका लागि तीन जना उम्मेदवार प्रतिष्प्रर्धामा थिए । २२५ सदस्यीय सदनमा ६ पटक प्रधानमन्त्री बनेका ७३ वर्षीय विक्रमासिंघेले १३४ मत प्राप्त गरे भने उनका निकटतम प्रतिद्वन्द्वी तथा असन्तुष्ट सत्तारुढ दलका नेता दुल्लास अलाहपेरुमाले ८२ मत पाए । वामपन्थी जनता विमुक्ति पेरामुना (जेभीपी) का नेता अनुरा कुमारा दिसानायकेले जम्मा तीन मत पाए ।
आर्थिक संकट चरम बन्दै गइरहेका बेला तत्कालीन राष्ट्रपति गोटाबाया राजापाक्षे गत साता देश छाडेर भागेका थिए। हजारौं प्रदर्शनकारी राष्ट्रपति निवास प्रवेश गरेपछि राजापाक्षे माल्दिभ्स हुँदै सिङ्गापुर पुगेका थिए।
प्रदर्शनकारीहरूले गत मे महिनामा प्रधानमन्त्री नियुक्त भएका विक्रमसिङ्घको समेत राजीनामा माग गरेका थिए। प्रदर्शनकारीहरूले उनको निजी निवासमा आगजनी गर्दै उनको सरकारी निवास कब्जा गरेका थिए। यद्यपि विक्रमसिङ्घले त्यस्ता मागलाई बेवास्ता गर्दै आएका थिए।
राजपक्षले देश छाडेपछि उनले स्वत: कार्यवाहक राष्ट्रपतिको भूमिका निर्वाह गर्दै आएका थिए।
उनलाई राजापाक्षेको सहयोगीका रूपमा हेरिन्छ ।
वि.सं.२०७९ साउन ४ बुधवार १४:२१ मा प्रकाशित
