हामी सबैकाे संसारन्यूज

काठमाडाैं । नेपाल नागरिकता पहिलो संशोधन विधेयक २०७९ राष्ट्रियसभाबाट पारित भएको छ । बिहीबार बसेको राष्ट्रियसभाको बैठकले उक्त विधेयकलाई बहुमतले पारित गरेको हो।

नागरिकता विधेयकमाथि प्रमुख प्रतिपक्षी दल एमाले विपक्षमा रह्यो भने सत्ता गठबन्धन दलले समर्थन गरेका थिए । बैठकमा अधिकांश संशोधनकर्ताहरुले वैवाहिक अंगीकृतहरुका लागि ७ वर्ष समयावधि राख्नुपर्ने माग गरेका थिए। केहीले पिताको थर र ठेगाना खुलाउन नपर्ने विषयमा पनि संशोधन खोजेका थिए।

गठबन्धनकै सांसद सांसद खिमलाल देवकोटाले वैवाहिक अंगीकृत नागरिकताको विषयमा आफ्नो फरक मत दर्ज गर्दै वैवाहिक अंगीकृत नागरिकताका लागि ५ वर्षको प्रावधान राख्नुपर्ने विषय फिर्ता लिएनन् । त्यस्तै, सांसद डा.बेदुराम भुषालले कानुन निर्माणमा पर्याप्त छलफल हुन नसकेको भन्दै असहमति जनाए । तर, उनले नागरिकता विधेयक राष्ट्रका लागि आवश्यक परेको र गृहमन्त्रीको प्रतिबद्धतालाई आधार मानेर आफ्नो समूहले गरेको संशोधन प्रस्ताव फिर्ता लिए ।

यस्तै सांसद तुलप्रसाद विश्वकर्मा, देवेन्द्र दाहाल, डा.विमला राई पौड्यालले संशोधन प्रस्ताव फिर्ता लिएनन् ।