हामी सबैकाे संसारन्यूज

काठमाडौं । तत्कालीन अर्थमन्त्री जनार्दन शर्माबारे छानबिन गर्न बनेको संसदीय विशेष समितिले शुक्रबार सभामुख अग्निप्रसाद सापकोटालाई प्रतिवेदन बुझाएको छ । बिहीबार प्रतिवेदन लेखन कार्य पूरा गरेको समितिले शुक्रबार दिउँसो सभामुख सापकोटालाई प्रतिवेदन बुझाएको हो ।

गत असार २२ मा गठन भएको समितिले झण्डै १७ दिनको छानबिन पछि प्रतिवेदन तयार पारेको हो। समितिको प्रतिवेदनमा भने प्रमुख प्रतिपक्षी दल एमालेका सांसदहरुले असहमति जनाएका छन्।

एमालेका सांसदले प्रतिवेदनमा राखिएको निष्कर्षको विरोध गरेका छन् । एमाले सांसदले आरोपितको मोबाइलको कल रेकर्ड र लोकेसन ट्र्याकिङ गर्न माग गरे पनि सत्तापक्ष सांसदको असहमतिका कारण उनीहरुको माग सम्बोधन भएन ।

बजेट निर्माण अघि जेठ १४ गते राति अनधिकृत व्यक्तिलाई अर्थ मन्त्रालयमा प्रवेश गराइ बजेटमा करका दर हेरफेर गरेको आरोप पूर्वअर्थमन्त्री शर्मालाई लागेको थियो । उक्त प्रकरणमा छानबिनका लागि संसदले विशेष छानबिन समिति गठन गरेसँगै शर्माले अर्थमन्त्रीबाट राजीनामा दिएका थिए ।