Sansar News
मुगु । मुगु जिल्लाको एकमात्र पन्ध्र शैथ्या जिल्ला अस्पताल बिकास समितिको अध्यक्ष पदमा युवानेता गजेन्द्रबहादुर मल्ल नियुक्त भएका छन् ।
कर्णाली प्रदेश स्वास्थ्य ऐन २०७८ को दफा १३ को उपदफा २ अन्र्तगत सामाजिक बिकास मन्त्रालयले मल्ललाई चारबर्षे कार्यकालको लागि मुगु अस्पताल बिकास समितिको अध्यक्षमा नियुक्त गरिएको हो ।
डेढ बर्षसम्म पदाधिकारी बिहिन अबस्थामा रहेको मुगु अस्पताल बिकास समितिले बल्ल पूर्णता पाएको जिल्ला स्वास्थ्य सेवा कार्यालयले जनाएको छ ।
पारसमणी मल्लको कार्यकाल सकिएपछि रिक्त रहेको अस्पताल बिकास समितिलाई डेढ बर्षमा सामाजिक बिकास मन्त्रालयले पूर्णता दिएपछि कामकाज गर्न सहज हुने भएको छ ।
लामो समयदेखि अस्पताल बिकास समितिमा अध्यक्ष नहुँदा कामकाज गर्न कठिनाई भइरहेको अबस्थामा मन्त्रालयले मल्ललाई अध्यक्षमा मनोनय गरेपछि सहज भएको जिल्ला स्वास्थ्य सेवा ब्यवस्थापक उमेश गौतमको भनाई छ ।
अस्पताल बिकास समितिका अध्यक्ष पदमा नियुक्ति भएका मल्लले आफनो चारबर्षे कार्यकालमा जिल्ला अस्पताल कुनै पनि कमी कमजोर हुन नदिने कार्यालय प्रमुख स्वास्थ्यकर्मी चिकित्सकसँग परामर्श गरि कामकाज अघि बढाउने बताएका छन् ।
अस्पतालको खानेपानी ब्यवस्थापन सरसफाईदेखि अन्य भौतिक संरचना निर्माणको लागि प्रदेश सरकार संघीय सरकार तथा बैदेशीक दातृ निकाय सित समन्वय सहकार्य गरि कामकाज गर्ने अध्यक्ष मल्लले बताए ।
‘जिल्ला अस्पतालमा एमडि चिकित्सकको अभाव छ, त्यसको पदपूर्ती गर्न प्रदेश सरकारसँग पहल गर्ने छु,’ मल्लले भने, ‘अस्पतालमा फार्मेसी सेवा संचालनमा ल्याउन र बिग्रिएका उपकरण मर्मत सम्भार गर्न म लागि पर्ने छु ।’
वि.सं.२०७९ साउन १५ आइतवार १४:३६ मा प्रकाशित
