Sansar News
काठमाडौं । बैदेशिक रोजगारीका लागि साउदी पुगेका नेपालीमध्ये एकवर्षमा २०६ जनाले ज्यान गुमाएका छन् ।
नेपाली दूतावास साउदीका अनुसार रोजगारीका लागि साउदी पुगेका नेपाली मध्ये २०७८ साउनदेखि २०७९ असार मसान्तसम्ममा २०६ जनाको मृत्यु भएको हो । ती मध्ये ३४ जनाले आत्महत्या गरेका छन् ।
मृत्यु भएकामध्ये १८० जनाको शव नेपाल पठाइएको र १८ जनाको साउदी अरबमै अन्तिम संस्कार गरिएको र ८ जनाको शव नेपाल पठाउन बाँकी रहेको दूतावासले जनाएको छ ।
दूतावासका अनुसार मृत्यु भएकाहरुमध्ये ११२ जनाको प्राकृतिक कारण (हृदयघात समेत) र ३४ जनाले आत्महत्याका कारण ज्यान गुमाएका हुन् ।
त्यस्तै, ३१ जनाको सडक दुर्घटनाबाट, १४ जनाको कार्य क्षेत्रमा दुर्घटनाका कारण र १४ जनाको कोरोना भाइरस संक्रमणका कारण मृत्यु भएको हो । एकजना नेपालीको भने हत्या भएको बताइएको छ ।
वि.सं.२०७९ साउन १५ आइतवार १४:५७ मा प्रकाशित
