हामी सबैकाे संसारन्यूज

काठमाडौं । चीन र ताइवानबीच विवाद बढ्दै गएको छ । अमेरिकी संसदकी सभामुख न्यान्सी पेलोसीको ताइवान भ्रमणबाट आक्रोशित चीन उनी फर्कनेबित्तिकै थप आक्रामक देखिएको छ । चीनले ताइवानलाई घेरा हाल्न आफ्नो सिमाना घेराबन्दी सुरु गरेको छ । चिनियाँ सेनाले ताइवान वरपर सैन्य कारबाही सुरु गरेको समाचारहरु अन्तराष्ट्रिय सञ्चार माध्यमले प्रशारण गरेका छन् ।

सञ्चार माध्यमका रिपोर्टहरु अनुसार चीनले ताइवान सीमामा युद्धअभ्यासका निम्ति युद्धपोत, लडाकु विमान र मिसाइलहरू तैनाथ गरेको छ। चिनियाँ जनमुक्ति सेनाले बिहीबारदेखि ताइवान टापुलाई चारै दिशाबाट घेरेर सैन्य अभ्यास गरेका छन् । बताइएअनुसार अहिले देखिएको सैन्य अभ्यास अहिलेसम्मकै ठूलो हो ।

न्यान्सीको भ्रमणबाट आक्रोशित बन्यो चीन

चीनको विरोधका बाबजुद अमेरिकी संसदकी सभामुख न्यान्सी पेलोसीले ताइवानको भ्रमण गरेकी थिइन् । २५ वर्षपछि अमेरिकाको तर्फबाट यो सबैभन्दा महत्वपूर्णं भ्रमण हो । यसअघि सन् १९९७ मा तत्कालीन सभामुख न्युट गिङरिच यहाँ आएका थिए ।

चेतावनीको बाबजुद पेलोसीको भ्रमण भएपछि स्तब्ध भएको चीनले आक्रामक रुपमा अभिव्यक्तिहरु दिइरहेको छ । जससँगै उसले ताइवानको सीमामा आफ्ना लडाकु विमानहरु उडाउन थालेको छ । पेलोसीले ताइवान छोड्नेबित्तिकै २७ चिनियाँ लडाकु विमान ताइवानको आकाशमा प्रवेश गरेका थिए ।

के छ चीन र ताइवानबीचको विवाद ?

ताइवान दक्षिणपूर्वी चीनको तटबाट करिब १०० माइल टाढा रहेको टापु हो। ताइवानले आफूलाई सार्वभौमसत्ता सम्पन्न राष्ट्र ठान्छ। यसको आफ्नै संविधान छ। ताइवानमा जनताद्वारा निर्वाचित पनि सरकार छ। उही समयमा, चीनको कम्युनिष्ट सरकारले ताइवानलाई आफ्नो देशको हिस्सा भएको दाबी गर्दछ। चीन यस टापुलाई फेरि आफ्नो नियन्त्रणमा लिन चाहन्छ।

चिनियाँ राष्ट्रपति सी चिनफिङले ताइवान र चीनको पुनः एकीकरणको कडा वकालत गरिरहेका छन् । ऐतिहासिक रूपमा, ताइवान कुनै समय चीनको हिस्सा थियो।

सम्बन्धित समाचार

युक्रेनपछि ताइवानमा युद्धको त्रास : चीनले खोल्ला त फायर ?