Sansar News
काठमाडौं । आगामी मंसिर ४ गते हुने प्रदेशसभा तथा प्रतिनिधिसभाको निर्वाचनमा सहभागी हुनका लागि नेकपा एमालेले दल दर्ताको निवदेन दिएको छ ।
मंगलबार निर्वाचन आयोगमा पुगेर पार्टीका उपाध्यक्ष युवराज ज्ञवाली, महासचिव शंकर पोखरेल, उपमहासचिवद्वय प्रदीप ज्ञवाली र विष्णु रिमाल, सचिव गोकर्ण विष्ट, स्थायी कमिटी सदस्यद्वय डा.राजन भट्टराई र कृष्णगोपाल श्रेष्ठ, केन्द्रीय सदस्य तथा निर्वाचन विभागका उपप्रमुख निरज आचार्य लगायत नेताहरू सहितको टोली निर्वाचन आयोग गएको थियो ।
दल दर्ताको निवेदन दिएपश्चात पार्टीका उपमहासचिव प्रदीप ज्ञवालीले संविधानको धारा २७१ र राजनीतिक दलसम्बन्धी ऐन, २०७४ को दफा १९ बमोजिम आवस्यक कागजातसहित दलदर्ताको निवेदन दिएको जानकारी दिएका छन् ।
आयोगका प्रवक्ता शालीग्राम पौडेलका अनुसार एमालेको दल दर्ताको निवेदन १० औं नम्बरमा दर्ता गरिएको हो ।
यसअघि सीके राउत नेतृत्वको जनमत पार्टी, मौलिक जरोकिलो पार्टी, नेपाल समावेशी पार्टी, हाम्रो नेपाली पार्टी, पुनर्जागरण पार्टी नेपाल, जनता प्रगतिशील पार्टी नेपाल, राष्ट्रिय विकास पार्टी, नेकपा माओवादी समाजवादी, राष्ट्रिय नागरिक पार्टीले मंसिर ४ गतेको निर्वाचनमा सहभागी हुनका लागि दलदर्ताको निवेदन दिइसकेको पनि प्रवक्ता पौडेलले जानकारी दिएका छन् ।
आगामी मंसिर ४ गते हुने निर्वाचनका लागि आयोगले आन्तरिक कार्यतालिका बनाएर काम सुरु गरिसकेको छ भने दलदर्ताको समय साउन ३० गतेसम्म रहेको छ ।
वि.सं.२०७९ साउन २४ मंगलवार १४:४९ मा प्रकाशित
