हामी सबैकाे संसारन्यूज

काठमाडौं । निलम्बित प्रधानन्यायाधिश चोलेन्द्र शमशेर राणाकी छोरीलाई एक सहकारीले २१ दिने सूचना निकालेर कर्जा तिर्न आउन पत्र काटेको छ ।

राणाकी छोरी सृष्टि राणालाई ललितपुरमा रहेको श्री लालीगुँरास बहुउद्देश्यीय सहकारी संस्था लिमिटेडले एक सूचना जारी गर्दै कर्जा तिर्न आउन अनुरोध गरेको हो ।

पुर्व गर्भनर तिलक रावलको बुहारी रहेकी श्रृष्टिले श्रीमान विनय रावलको व्यक्तिगत जमानीमा व्यवसायीक कर्जा लिएको र पटक पटक लिखित तथा मौखिक रुपमा तोकेता गर्दा पनि सम्झौता बमोजिम साँवा, व्याज र अन्य दस्तुर नतिरेको र भाखा समेत नाघेकोमा राणाले वेवास्ता गरेको भन्दै यस्तो सूचना जारी गरेको हो ।

‘सूचना प्रकाशित भएको मितिले २१ दिनभित्र यस संस्थामा सम्पर्क राखी लिएको कर्जाको साँवा, व्याज तथा अन्य दस्तुर समेत चुक्ता गर्नुहोला । अन्यथा संस्थाको ऋण लगानी तथा असुली सम्बन्धी विनियमावली, संस्थाको विनियम तथा सहकारी ऐन २०७४, नियमावली २०७५ ले दिएको अधिकार प्रयोग गरी ऋणी तथा जमानीको फोटोसहितको विवरण खुलाई पुन ः ३५ दिने सूचना प्रकाशित गरी संस्थाको नाममा दृष्टिबन्धकी पारित गरी दिएको धितो (घरजग्गा) लिलाम विक्रिी गरी सम्पूर्ण कर्जा असुल उपर प्रक्रिया अगाडि बढाइने जानकारी गराइन्छ ।’ उक्त सूचनामा भनिएको छ ।