हामी सबैकाे संसारन्यूज

काठमाडाैं । जनता समाजवादी पार्टी नेपालका अध्यक्ष उपेन्द्र यादवले पाँच दलीय गठबन्धनबाट आफ्नो पार्टी नबाहिरिने बताएका छन् । सीट बाँडफाँटमा किचलाे बढेका बेला बाहिरिने बताएका उनले बाेली फेरेका हुन् । यादवले गठबन्धन अझ सशक्त भएर अगाडि बढ्ने र त्यसमा जसपाको पूर्ण सहयोग रहने बताएका छन् ।

पाँच दलीय गठबन्धन बनाउनमा जसपामा मुख्य भूमिका रहेको बताउँदै उनले यस्तो अवस्थामा त्यतिकै छाडेर जाने कल्पना पनि गर्न नसकिने बताए । गठबन्धन बैठकमा सहभागी हुनुअघि सञ्चारमाध्यमसँग कुराकानी गर्दै अध्यक्ष यादवले सीट बाँडफाँटका कारण गठबन्धनमा कुनै प्रकारको संकट नआओस् भनि सचेत मात्र गराएको बताए ।

‘गठबन्धनमा रहेका दलहरूको आ–आफ्नो शक्ति र पहिचान छ त्यहीअनुसार सबैको व्यवस्थापन हुन्छ’, उनले भने । अध्यक्ष यादवले शुक्रबारकाे बैठकबाट बाँडफाँटकाे टुंगाे लाग्ने पनि दाबी गरेका छन् । सीट बाँडफाँटकाे लागि गठबन्धनका शीर्ष नेताहरू आज निर्णायक छलफलमा बस्दैछन् ।