हामी सबैकाे संसारन्यूज

काठमाडाैं । निर्वाचन आयोगले आउँदो मंसिर ४ गतेको आमनिर्वाचनका दिन सार्वजनिक यातायातका साधन सञ्चालन गर्न दिने भएको छ । मतदानका दिन सार्वजनिक यातायात बन्द गर्दै आएकाे आयाेगले यस पटक खुल्ला गर्ने तयारी गरेकाे हाे ।

आयाेगका प्रमुख आयुक्त दिनेशकुमार थपलियाले सबैकाे सुझाबअनुसार यातायातका साधन चल्न दिने निर्णय भएको जानकारी दिए । यातायात सञ्चालन बन्द गर्दा झनै समस्या बढेकाे उनले बताए ।

‘स्थानीय तहलगायत विगतका निर्वाचनमा मतदानको दिन सार्वजनिक यातायात बन्द हुँदा अप्ठ्यारो बाटोबाट मतदाता ओसार्दा आचारसंहिताको बर्खिलाप हुने, जेष्ठ नागरिकहरु, अशक्त व्यक्तिहरु मतदान केन्द्र टाढा छ भने अन्य व्यक्तित्वहरुलाई अप्ठेरो पर्ने र त्यसदिन आवगमनका निम्ति सवारी अनुमति माग्नेको भिड व्यवस्थापन गर्न पनि कठिन भएकोले सबैको सुझावको आधारमा मंसिर ४ गतेको दिन व्यवस्थित ढंगले यातायात सञ्चालन गर्ने निर्णय गरेका छौं’, आयोगले शनिबार आयोजना गरेको पत्रकार सम्मेलनमा प्रमुख आयुक्त थपलियाले भने ।

निर्वाचनकाे दिन व्यवस्थित यातायात सञ्चालन गर्ने वा नगर्ने भन्ने विषयमा आयाेगले यसअघि कार्यदल नै गठन गरि सुझाब मागेकाे थियाे । आयुक्त थपलियाले बताएअनुसार उक्त कार्यदलले दिएकाे सुझाबका आधारमा यातायात सञ्चालन गर्न लागिएकाे हाे ।

आयुक्त थपलियाले बताएअनुसार यसअघि निर्वाचनकाे दिन नेपाल बन्द हाे कि भन्ने प्रश्नसमेत उठ्ने गरेकाे थियाे । उनले अघि भनेका छन्, ‘अब निर्वाचनको दिन नेपाल बन्दको दिन हो कि भन्ने अभिव्यक्ति दिनुपर्ने छैन र हामीले पनि सुन्नुपर्ने छैन भन्नेमा हामी ढुक्क छौं ।’