हामी सबैकाे संसारन्यूज

काठमाडौं । प्रतिनिधिसभा र प्रदेशसभाको उम्मेदवारी मनोनयन प्रक्रिया सुरु भएको छ । प्रतिनिधिसभाका १६५ र प्रदेशसभाका ३३० सिटका लागि उम्मेदवारहरुले मनोनयन दर्ता गरिरहेका छन् ।

शीर्ष तहका अधिकांश नेताहरु पनि आ–आफ्नो चुनावी क्षेत्रमा पुगेर मनोनयन दर्ता गरिरहेका छन् ।

एमालेका अध्यक्ष केपी शर्मा ओलीले झापाको निर्वाचन क्षेत्र नम्बर ५ बाट उम्मेदवारी दर्ता गराएका छन् । पूर्वप्रधानमन्त्रीसमेत रहेका ओलीले दमकस्थित निर्वाचन अधिकृतको कार्यालय पुगेर उम्मेदवारी दर्ता गराएका हुन् ।

झापामा एमाले र राष्ट्रिय प्रजातन्त्र पार्टीबीच चुनावी तालमेल भएको छ । ओलीले उम्मेदवारी दर्ता गराएको क्षेत्रमा राप्रपाले सहमतिमै उम्मेदवार उठाएको छैन ।

यता, एकीकृत समाजवादी अध्यक्ष माधवकुमार नेपालले पनि प्रतिनिधिसभा सदस्यका लागि उम्मेदवारी दर्ता गराएका छन् । उनले रौटहट क्षेत्र नम्बर १ बाट उम्मेदवारी दर्ता गराएका हुन् ।

पूर्वप्रधानमन्त्रीसमेत रहेका अध्यक्ष नेपाल उम्मेदवारी दर्ता गराउन गौरस्थित मुख्य निर्वाचन अधिकृतको कार्यालय आफैं पुगेका थिए ।

यता, माओवादी केन्द्रका अध्यक्ष पुष्पकमल दाहाल ‘प्रचण्ड’ पनि उम्मेदवारी दर्ता गर्न गोरखा पुगेका छन् । चितवन–३ बाट उम्मेदवारी दिने तयारी गरेका प्रचण्ड अन्तिम समय गोरखा–२ बाट निर्वाचन लड्ने निर्णयमा पुगेका थिए । प्रचण्ड पूर्वप्रधानमन्त्रीसमेत रहेका डा. बाबुराम भट्टराईसँगै उम्मेदवारी दर्ता गर्न गोरखा पुगेका छन् ।

प्रधानमन्त्री शेरबहादुर देउवा भने उम्मेदवारी दर्ता गर्न आफुँ गएका छैनन् । देउवाले पत्नी आरजु राणालाई मनोनयन दर्ता गर्न पठाएका छन् । राणा शनिबारदेखि नै डडेलधुरा पुगेकी थिइन् ।