हामी सबैकाे संसारन्यूज

काठमाडाैं । नेकपा (माओवादी केन्द्र)ले प्रतिनिधि सभा र प्रदेश सभाको निर्वाचनलाई मध्यनजर गर्दै चुनावी प्रतिबद्धतापत्र सार्वजनिक गरेकाे छ। सोमबार पार्टी केन्द्रीय कार्यालय पेरिसडाँडामा आयोजित कार्यक्रमका बीच चुनावी प्रतिबद्धतापत्र सार्वजनिक गरिएको हो।

माओवादीले आफ्नाे प्रतिबद्धतापत्रमा राजनीतिक आन्दोलनबाट प्राप्त व्यवस्था रक्षा र अवस्था परिवर्तन आफ्नो नेतृत्वमा मात्रै सम्भव भएको बताएको छ । राजनीतिक परिवर्तनलाई साधन र माध्यम बनाएर जनताको जीवन फेर्नु र नयाँ नेपाल बनाउन आफ्नो नेतृत्वमा मात्रै सम्भव हुने उसकाे जिकिर छ ।

प्रतिनिधिसभा र प्रदेशसभा निर्वाचनका लागि तयार पारिएको प्रतिबद्धतापत्रमा भनिएको छ, ‘नेपालको लोकतान्त्रिक क्रान्तिलाई आधारभूत रूपमा पूर्णता दिने राजनीतिक परिवर्तनका सबै जसो एजेन्डाहरू– गणतन्त्र, सङ्घीयता, धर्मनिरपेक्षता, समानुपातिक समावेशीकरण, सामाजिक न्याय, समाजवाद उन्मुखता हाम्रो पार्टीले अघि सारेको, स्थापित गरेको र हासिल गर्न निर्णायक भूमिका खेलेको तथ्य घाम जतिकै छर्लङ्ग छ । हाम्रो पार्टीको नेतृत्वदायी मुख्य भूमिकाबाट नै उत्पीडित वर्ग, मजदुर, किसान, महिला, आदिवासी जनजाति, मधेसी, दलित, थारु, मुस्लिम, पिछडिएको क्षेत्र, भाषिक, सांस्कृतिक सीमान्तकृत एवं लोपोन्मुख समुदायको अधिकार र उपलब्धि सम्भव भएको हो । यस निम्ति हाम्रो पार्टी गौरव गर्दछ ।’

माओवादीले आफ्नाे प्रतिबद्धतापत्रमा कृषि क्षेत्रको रुपान्तरण, जलविधुत, स्वास्थ्य, शिक्षालगायतका विषयवस्तुलाई प्राथमिकतामा राखेको छ ।

माओवादी केन्द्रले स्थिर राजनीतिका लागि प्रत्यक्ष निर्वाचित राष्ट्रपतिको अजेन्डालाई पुनः प्रस्तुत गरेको छ। २०६४ को पहिलो संविधान सभा निर्वाचनदेखि यो अजेन्डा प्रस्तुत गरेको भए पनि २०७२ मा जारी संविधानमा उसको यो अजेन्डा उल्लेख भएको थिएन। तर मंसिर ४ को निर्वाचनका लागि प्रस्तुत प्रतिबद्धतापत्रमा यो विषयलाई पुनः स्थान दिइएको हो।

यस्ताे छ प्रतिबद्धतापत्र