Sansar News
काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रले प्रचण्डका बारेमा आफ्नो धारण यथावत रहेको बताएका छन् ।
राप्रपाको समेत समर्थनमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ को नेतृत्वमा नयाँ सरकार बनेपछि मिश्रले राप्रपा सरकारमा कुनै हालतमा पनि नजाने तर जानै परेमा शर्तसहित जाने बताएका छन् ।
उनले राप्रपाको समर्थन विना सरकार नै बन्न नसक्ने अवस्था देखिएकाले अन्तिम घडीमा राप्रपाले समर्थन गरेको समेत बताएका छन् ।
‘बहुमतको सरकार नै बन्न नसक्ने अवस्था देखिएका कारण अन्तिम घडीमा राप्रपाले सरकार निर्माणमा समर्थन गर्ने निर्णय गरेको हो, मिश्रले सामाजिक संजालमा भनेका छन्, ‘तर राप्रपाको बैठकले निर्णय गरिसक्दा बाहिर अरू केहीले पनि समर्थन गरि सकेछन्, जसले गर्दा धेरैलाई राप्रपाले समर्थन नगरेको भए पनि बहुमतको सरकार निर्माण हुन्थ्यो भन्ने पर्यो, जुन साँचो हो । तर, अवस्था सोचेभन्दा फरक किसिमबाट विकशित भएको थियो ।’ मिश्रले भनेका छन् ।
.यस्ता छन् राप्रपाका तीन शर्त
१–पौष २७ गतेलाई ‘राष्ट्रिय एकता दिवस’ अथवा ‘नेपाल दिवस ‘Nepal Day’ घोषणा गरियोस् ।
२ संविधानको अन्तिम मस्यौदा तयार पार्दा संविधानसभाले जनतासँग धर्म निरपेक्षताबारे औपचारिक रूपमा संकलन गरेको ‘जनमत’को यथार्थ विवरण सार्वजनिक गरियोस् र जनताको चाहाना अनुरूप निर्णय गरियोस् ।
३–उच्चस्तरीय नागरिक आयोग गठन गरेर २०४६ सालपछिका सबै उच्चपदस्थको सम्पत्ति छानविन गरि दोषीलाई कारवाही गरियोस् ।
वि.सं.२०७९ पुस १३ बुधवार १२:५७ मा प्रकाशित
