हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी (राप्रपा) ले सरकारमा सहभागी हुने निर्णय गरेको छ ।

बुधबार बसेको सो पार्टीको केन्द्रीय कार्यसम्पादन समितिको बैठकले सत्ता गठबन्धनबीच न्यूनतम साझा कार्यक्रम तय गरेर सहमति भएपछि मात्रै सरकारमा सहभागी हुने निर्णय गरेको सो पार्टीका प्रवक्ता मोहन कुमार श्रेष्ठले जानकारी दिएका छन् ।

‘सरकारलाई समर्थन गरेका राजनीतिक दलकाबीच न्यूनतम साझा कार्यक्रम तय गरेर सहमति भएपछि मात्रै सरकारमा सहभागी हुने निर्णय भएको छ’ प्रवक्ता श्रेष्ठले भनेका छन् ।

गत पुस १० गते एमालेसहित ७ दल र केही स्वतन्त्र सांसदको समर्थनमा माओवादी केन्द्रका अध्यक्ष पुष्पकमल दाहाल ‘प्रचण्ड’को नेतृत्वमा गठन भएको सरकारलाई राप्रपाले समर्थन गरेपनि सरकामा सहभागी भएको थिएन । आजको बैठकले सशर्तरुपमा सरकारमा सहभागी हुने निर्णय गरेको हो ।

यस्तो थियो पार्टीका तर्फबाट मिश्रले राखेको तीन शर्त
यसअघि सो पार्टीका वरिष्ठ उपाध्यक्ष रवीन्द्र मिश्रले आफुहरुका तीन शर्त पूरा भएमा सरकारमा जाने बताएका थिए । उनले पौष २७ गतेलाई ‘राष्ट्रिय एकता दिवस’ अथवा ‘नेपाल दिवस घोषणा गर्न माग गरेका थिए ।

त्यस्तै दोस्रोमा संविधानको अन्तिम मस्यौदा तयार पार्दा संविधानसभाले जनतासँग धर्म निरपेक्षताबारे औपचारिक रूपमा संकलन गरेको ‘जनमत’को यथार्थ विवरण सार्वजनिक गर्न र जनताको चाहाना अनुरूप निर्णय गर्न माग गरेका थिए ।
त्यस्तै तेस्रो नम्बरमा उच्चस्तरीय नागरिक आयोग गठन गरेर २०४६ सालपछिका सबै उच्चपदस्थको सम्पत्ति छानविन गरि दोषीलाई कारवाही गरियोस् भन्ने शर्त राखेका थिए ।

राप्रपाको सरकारलाई समर्थन, सरकारमा जान रवीन्द्र मिश्रले राखे यी तीनशर्त