हामी सबैकाे संसारन्यूज

काठमाडौं । सुदूरपश्चिमका प्रदेश प्रमुख देवराज जोशीले सरकार गठनका लागि भोलि दलहरुलाई आव्हान गर्ने भएका छन् । आज नै आव्हान गर्ने तयारी गरेका उनले दलहरुको सुझाब पछि भोलिको तयारी गरेका हुन् ।

भोलि १० बजे नयाँ सरकार गठनका लागि आव्हान गर्ने तयारी गरेको प्रदेश प्रमुख कार्यालयले जनाएको छ ।

प्रदेशमा कसैको पनि बहुमत नभएको कारण संविधानको धारा १६८ को उपधारा (२) बमोजिम सरकार गठनको लागि आव्हान गर्न लागिएको हो ।

सुदूरपश्चिम प्रदेशमा ५३ जना प्रदेश सभा सदस्य छन् । बहुमतको सरकार बनाउन २७ सांसदको समर्थन आवश्यक पर्दछ ।

प्रदेशमा कांग्रेसका १९, माओवादी केन्द्रका ११, एमालेका १०, नागरिक उन्मुक्तिका सात नेकपा एकीकृत समाजवादीका चार राप्रपाका एक र स्वतन्त्र एक सांसद छन् । केन्द्रको सत्ता गठबन्धनले प्रदेशमा पनि आफ्नो सरकार बनाउने योजना बनाएको छ । तर, यहाँ सात सांसद भएको नागरिक उन्मुक्ति पार्टीले आफैं दाबी गरेको छ । उन्मुक्ति पार्टीले सहयोग नगरी कुनै पनि दलको सरकार बन्ने अवस्था छैन ।

तर, केन्द्रको सरकार निर्माणमा समर्थन गरेको उन्मुक्ति पार्टीले अरुलाई सहयोग गर्नेभन्दा आफ्नै नेतृत्वमा सरकार बनाउने योजना बनाएको छ । यस्तोमा कसको नेतृत्वमा कसले सरकार बनाउने अन्योल देखिएको छ ।