हामी सबैकाे संसारन्यूज

काठमाडौं । गृहमन्त्रलायले कर्तव्य ज्यान मुद्दामा फरार भनिएका सांसद लक्ष्मी महतो कोइरीलाई तत्काल पक्राउ गर्न निर्देशन दिएको छ ।

गत मंसीर ४ मा सम्पन्न प्रतिनिधि सभा र प्रदेश सभा निर्वाचनमा महोत्तरी क्षेत्र नम्बर १ बाट प्रतिनिधि सभा सदस्यमा निर्वाचित कोइरीलाई पक्राउ गर्न मन्त्रालयले निर्देशन दिएको हो ।

गृहमन्त्री रवि लामिछानेले यसअघि पनि पटक–पटक कोइरीलाई पक्राउ गर्नभन्दै मौखिक निर्देशन दिएपनि उनी फरारको सूचीमा रहेपछि गृहले शुक्रबार बेलुका विज्ञप्ति जारी गर्दै सो निर्देशन दिएको हो ।

‘उपप्रधान तथा गृहमन्त्रीले पटक–पटक दिएको मौखिक निर्देशन कार्यान्वयन नभएकोमा गम्भीर ध्यानाकर्षण भएको छ,’ गृहमन्त्रालयका प्रवक्ता फणिन्द्रमणि पोखरेलद्धारा जारी विज्ञप्तिमा भनिएको छ, ‘निज प्रतिवादीलाई कानुन बमोजिम पक्राउ गरी तत्काल प्रक्रिया अघि बढाउन मन्त्रालयले प्रहरी प्रधान कार्यालयलाई पत्राचार गरेको व्यहोरा अनुरोध छ ।’

एमालेका तर्फबाट प्रतिनिधि सभा सदस्यमा निर्वाचित सांसद कोइरीमाथि मधेश आन्दोलनका क्रममा घाइते अस्पताल लैजादै गरेका सई थमन थापालाई एम्बुलेन्सबाटै थुतेर हत्या गरेको अभियोग लागेको छ ।