हामी सबैकाे संसारन्यूज

काठमाडौं । अन्तर्राष्ट्रिय मनिटरी फण्ड (आईएमएफ)ले सन् २०२३ मा विश्वको अर्थतन्त्र २.९ प्रतिशतले बढ्ने प्रक्षेपण गरेको छ ।

आईएमएफले पछिल्लो प्रतिवेदन सार्वजनिक गर्दै यसअघि गरेको प्रक्षेपणको तुलनामा ०.२ प्रतिशतले विश्व अर्थतन्त्र सुधारिने आंकलन गरेको हो । यसअघि, आईएमएफले सन् २०२३ को अर्थतन्त्र २.७ प्रतिशतले सुधारिने प्रक्षेपण गरेको थियो ।

रुस युक्रेन युद्धका बाबजुद विश्व बजारमा इन्धनको मूल्य सस्तिँदा विश्वभर आर्थिक गतिविधि बढ्दा अर्थतन्त्र सुधारिने प्रक्षेपण आईएमएफको छ । यस्तै, यसअघि आईएमएफले सन् २०२२ विश्वको अर्थतन्त्र ३.२ प्रतिशतले सुधारिने प्रक्षेपण गरेकोमा ३.४ प्रतिशतले सुधारिएको छ । यस्तै, सन् २०२४ मा विश्व अर्थतन्त्र ३.१ प्रतिशतले बढ्ने प्रक्षेपण समेत आईएमएफको छ ।

आईएमएफले सन् २०२३ मा विश्व अर्थतन्त्र २.९ प्रतिशतले सुधारिने भएपनि बेलायतको अर्थतन्त्रमा संकुचन आउने प्रक्षेपण गरेको छ । आईएमएफका अनुसार यो वर्ष बेलायतको अर्थतन्त्र ०.६ प्रतिशतले ऋणात्मक हुनेछ । यो विकसित तथा सबल अर्थतन्त्र भएका मुलुकहरुमध्ये सबैभन्दा ठुलो संकुचन हो ।

यस्तै, अमेरिकाको अर्थतन्त्र १.४ प्रतिशतले बढ्ने छ भने युरो क्षेत्रको अर्थतन्त्र ०.७ प्रतिशत, फ्रान्सको ०.७, जर्मनीको ०.१, इटालीको ०.६, स्पेनको १.१ र जापानको अर्थतन्त्र १.८ प्रतिशतले बढ्ने छ । यसैगरी, छिमेकी चीन र भारतको अर्थतन्त्र क्रमशः ५.२ र ६.१ प्रतिशतले बढ्नेछ । युक्रेनमा सैन्य हमला गरिरहेको रुसको अर्थतन्त्र समेत यो वर्ष सुधारिने छ । रुसको अर्थतन्त्र सन् २०२३ मा ०.३ प्रतिशतले सुधारिने छ ।