Sansar News
काठमाडौं । राष्ट्रिय स्वतन्त्र पार्टी (रास्वपा) ले प्रधानमन्त्री पुष्पकमल दाहाल प्रचण्डलाई दुई दिन समय दिने भएको छ ।
सो पार्टीको बिहीबार बसेको केन्द्रीय समिति तथा संसदीय दलको संयुक्त बैठकले प्रधानमन्त्रीले गृहमन्त्रालयका विषयमा निर्णय गर्नका लागि मागेको दुईदिन समयमा सहमत हुँदै प्रधानमन्त्रीलाई अझै दुईदिन कुर्ने निर्णय गरेको सो पार्टीका महामन्त्री मुकुल ढकालले जानकारी दिएका छन् ।
‘राजनीतिक परिस्थितिलाई मुल्यांकन गरेर शुक्रबार र शनिबारको समय कुर्ने र थप छलफल गरेर निर्णय लिने भनेर समय दिएका हौं । दलहरुले राजनीतिक इमान्दारिता नदेखाएमा पार्टीले जे निर्णय पनि लिन सक्छ ।’ प्रवक्ता ढकालले भने ।
नागरिकता विवादमा रास्वपाका सभापति रवि लामिछानेले उपप्रधान तथा गृहमन्त्री र सांसद पदबाट राजीनामा दिनु् परेपछि खाली रहेको गृहमन्त्रालयमा रास्वपाले आफ्नो दावी गर्दै आएको छ । गत शुक्रबार सर्वोच्चको फैसलापछि पुनः नेपाली नागरिकता लिएका लामिछानेले तत्कालै आफुलाई गृहमन्त्रीमा नियुक्त गर्न प्रधानमन्त्री समक्ष आग्रह गरेका थिए । तर, प्रधानमन्त्रीले भने सर्वोच्चको फैसलाको पूर्णपाठ नआउँदा सम्म रास्वपालाई गृह दिन नमिल्ने बताउँदै आएका छन् ।
वि.सं.२०७९ माघ १९ बिहीवार २१:०२ मा प्रकाशित
