हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल ‘प्रचण्ड’ले प्रतिनिधिसभाबाट विश्वासको मत पाएका छन् । सोमबार बसेको प्रतिनिधिसभाको बैठकमा उपस्थित २६२ सांसदमध्ये १७२ जनाले प्रधानमन्त्री प्रचण्डलाई विश्वासको मत दिएका हुन् ।

प्रधानमन्त्री प्रचण्डको प्रस्तावको विपक्षमा ८९ सांसदको मत परेको छ । संसदको ठूलो दल नेकपा (एमाले) र राष्ट्रिय प्रजातन्त्र पार्टीले विपक्षमा मतदान गरेका छन् । नेपाल मजदुर किसान पार्टीले प्रचण्डको प्रस्तावमाथि पक्ष र विपक्षमा मत नहाली दिन्न भन्नेमा हालेको छ ।

प्रधानमन्त्री प्रचण्डको पक्षमा नेपाली कांग्रेस, माओवादी केन्द्र, राष्ट्रिय स्वतन्त्र पार्टी, जनता समाजवादी पार्टी, एकीकृत समाजवादी, लोकतान्त्रिक समाजवादी पार्टी, जनमत पार्टी, नागरिक उन्मुक्ति पार्टी, राष्ट्रिय जनमोर्चा र आम जनता पार्टीले विश्वासको मत दिएका हुन् ।

गत पुस १० मा एमाले, रास्वपा, राप्रपासहितका पार्टीको सहयोगमा प्रचण्ड प्रधानमन्त्री भएका थिए । पुस १० मा प्रधानमन्त्री बनेका प्रचण्डले पुस २६ मा विश्वासको मत लिएका थिए । तत्कालिन समय संसद बैठकमा उपस्थित २७० सांसदहरुमध्ये प्रचण्डलाई २६८ जनाले विश्वासको मत दिएका थिए ।

तर, राष्ट्रपति निर्वाचनसँगै उक्त तत्कालिन गठबन्धन भंग भएको थियो । सत्ता साझेदार एमाले र राप्रपा सरकारबाट बाहिरिँदा सरकारलाई दिएको समर्थन पनि फिर्ता लिएका थिए । जसको आधारमा प्रचण्डले पुनः विश्वासको मत लिएका हुन् ।