Sansar News
काठमाडौं । बागमती प्रदेशका मुख्यमन्त्री शालिकराम जम्मकट्टेलले आज दिउँसो विश्वासको मत लिने भएका छन् ।
आज दिउँसो १ बजे बस्ने बाग्मती प्रदेश सभाको बैठकबाट मुख्मन्त्री जम्मकट्टेलले विश्वासको मत लिने भएका हुन् ।
यसअघि बुधबारका लागि बोलाइएको प्रदेश सभाको बैठकमा नेपाली कांग्रेसका सांसद उपस्थित नभएपछि आजका लागि बैठक सारिएको थियो । नेपाली कांग्रेसका सांसदहरुले मुख्यमन्त्री जम्मकट्टेलले आफुहरुसँग सल्लाह नगरि विश्वासको मत लिन बैठक बोलाएको भन्दै अससन्तुष्टि जनाएका थिए ।
बागमती प्रदेशमा ठूलो दलको रुपमा रहेको नेपाली कांग्रेसले मुख्मन्त्रीमा दावी गर्दै आएको छ । यद्यपी पार्टीका सभापति शेरबहादुर देउवाको निर्देशनपछि पहिलो चरणमा मुख्यमन्त्रीमा जम्मकट्टेललाई विश्वासको मत दिन तयार भएका छन् ।
मुख्यमन्त्री जम्मकट्टेलले गठबन्धन दलहरुभित्र भएको सहमति अनुसार आफुले विश्वासको मत पाउनेमा ढुक्क रहेका छन् ।
गत फागुन १३ गते राष्ट्रिय प्रजातन्त्र पार्टी (राप्रपा) ले सरकारलाई दिएको समर्थन फिर्ता लिएपछि जम्मकट्टेलले पुन : विश्वासको मत लिन लागेका हुन् ।
वि.सं.२०७९ चैत १० शुक्रवार ०९:१७ मा प्रकाशित
