Sansar News
काठमाडौं । कोरोना भाइरस (कोभिड–१९)को संक्रमणबाट मंगलबार एकैदिन दुई जनाको ज्यान गएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा दुई संक्रमितको ज्यान गएको हो ।
मन्त्रालयका अनुसार पछिल्लो घटनासँगै नेपालमा कोरोना संक्रमणबाट ज्यान गुमाउनेको संख्या १२ हजार २५ पुगेको छ ।
मन्त्रालयले जनाएअनुसार पछिल्लो समय संक्रमितको संख्यामा पनि निकै बृद्धि भएको छ । पछिल्लो २४ घण्टामा दुई हजार २९२ जनाको स्वाब परीक्षण गर्दा थप एक सय ७१ जनामा संक्रमण देखिएको छ ।
मन्त्रालयले जनाएअनुसार थपिएका संक्रमितसहित देशभर सक्रिय संक्रमितको संख्या तीन सय ९७ जना पुगेको छ ।
जसमध्ये संस्थागत आइसोलेसनमा २२, आइसीयूमा ८, भेन्टिलेटरमा राखेर ४ जनाको उपचार भइरहेको मन्त्रालयले जनाएको छ ।
मन्त्रालयले सहरी क्षेत्र तथा जनघनत्व बढी भएको क्षेत्रमा संक्रमित बढी देखिएका छन् । मन्त्रालयले थप सर्तकता अपनाउन पनि आग्रह गरेको छ ।
वि.सं.२०८० वैशाख ५ मंगलवार १८:१२ मा प्रकाशित
