हामी सबैकाे संसारन्यूज

काठमाडौं । महानगरपालिका क्षेत्र भित्रका विभिन्न ठाउँमा पर्चा फ्याँकेर फोहर गर्ने ६१ जनालाई शुक्रबार विहान महानगर प्रहरीले पक्राउ गरेको छ ।

माध्यामिक शिक्षा अन्तर्गत कक्षा १२ को अन्तिमा परिक्षा चलिरहँदा परिक्षा केन्द्र रहेका विद्यालय आगाडीका सार्वजनिक स्थानहरुमा विभिन्न शैक्षिक परामर्श केन्द्र तथा नीजि कलेजहरुले पर्चा फ्याँकेर फोहर गर्ने गरेका थिए ।

स्थानीयले सार्वजनिक स्थानमा फोहर भएको गुनासो गरेपछि तीन दिन लगाएर सूचना संकलन गरि फोहर गर्न संलग्नलाई महानगरले पक्राउ गरेको  छ ।

पक्राउ परेकाहरु विभिन्न २५ शैक्षिक संस्थाले पर्चा बाँड्न परिचालन गरेका व्यक्तिहरु रहेको महानगर प्रहरी बलका एक अधिकृतले जानकारी दिए । पक्राउ परेकाहरुबाट संस्थागत कसुरका आधारमा न्यूनतम पाँच हजार जरिवाना गरिने ती अधिकृतले जानकारी दिए ।

अघिल्ला वर्षहरुमा पनि कक्षा १२ को परिक्षा चलिरहँदा परिक्षा केन्द्रहरु अगाडी पर्चा छरेर फोहोर गर्ने विभिन्न शैक्षिक परामर्शकेन्द्र तथा नीजि कलेजहरुलाई जरिवाना गर्ने गरिएको थियो ।

महानगरले पक्राउ गरि जरिवाना गर्दा पनि च्याउ झैं खोलिएका शैक्षिक परामर्श केन्द्रहरुले गर्ने फोहर भने रोकिएको छैन । यसले संस्कृतिक शहरको रुपमा चिनिएको काठमाडौं महानगरको शौन्दर्यमा नै गम्भिर असर परिरहेको भन्दै संस्कृतिक अभियान्तहरुले चिन्ता व्यक्त गरेका छन् ।