हामी सबैकाे संसारन्यूज

काठमाडौं । मोबाइल डिभाइस म्यानेजमेन्ट सिस्टम (एमडीएमएस) आजदेखि लागु भएको छ । नेपाल दूरसञ्चार प्राधिकरणले नेपालमा मोबाइल सेटहरुको प्रयोग र आयातलाई व्यवस्थित गर्न एमडीएमएस लागु गरेको हो । एमडीएमएस लागु भएसँगै अब दर्तावाला मोबाइल मात्रै चल्नेछन् ।

दूरसञ्चार प्राधिकरणले जनाएअनुसार व्यक्तिगत प्रयोजनका लागि विदेशबाट ल्याई भन्सार कार्यालयमा जाँच पास भएका मोबाइल सेटहरु एमडीएमएस प्रणालीमा स्वतः दर्ता हुनेछन् । मोबाइल आयातकर्ता र विक्रेताहरुले मोबाइल आयात गर्नुअघि नै अनिवार्यरुपमा प्राधिकरणको पूर्वस्वीकृति लिनुपर्ने प्राधिकरणले जनाएको छ ।

प्राधिकरणले नेपालमै मोबाइल किन्दा पनि एमडीएमएसमा दर्ता भए/नभएको यकिनपछि मात्रै खरिद गर्न ग्राहक वर्गलाई सचेत गराएको छ ।

एमडीएमएस प्रणाली लागु भएसँगै विदेशमा काम गरेर फर्केका व्यक्तिले आफ्नो एक थान र थप एक थान फोन महसुल नतिरी ल्याउन सक्नेछन् । तर, कम्तिमा ६ महिना विदेश काम गरी फर्केका नेपाली नागरिकको हकमा मात्रै त्यस्तो सुविधा प्राधिकरणले दिनेछ ।

प्राधिकरणले हालसम्म नेपालमा सञ्चालित सबै मोबाइल स्वतः दर्ता भएको जनाएको छ । तर, अब प्रक्रियामा नजाने मोबाइलमा सिम चल्दैन ।

प्राधिकरणले केही वर्ष अघिदेखि नै एमडीएमएस लागु गर्न प्रयत्न गरिरहेको थियो । अवैध मोबाइलको खरिद–बिक्रीलाई रोक्न प्राधिकरणले गरेको यस तयारीमा सरकारले सहयोग नगर्दा काम अगाडि बढ्न सकेको थिएन ।

यसअघि प्राधिकरणले पुस १५ गतेदेखि लागु गरेको घोषणा गरेको भएपनि चौतर्फी विरोधपछि सरकारले फिर्ता लिन निर्देशन दिएको थियो । वैदेशिक रोजगारीमा गएका नागरिकको मागलाई सम्बोधनपछि सरकारले एमडीएमएस लागु गर्ने बाटो खोलिदिएको थियो ।

सम्बन्धित समाचार

अब विदेशबाट आउँदा २ वटासम्म मोबाइल ल्याउन पाइने