हामी सबैकाे संसारन्यूज

काठमाडौं । टिकापुर हत्याकाण्डमा दोषी ठहर भइ जेल जीवन बिताइरहेका नागरिक उन्मुक्ति पार्टीका संस्थापक रेशक चौधरीबारे सर्वोच्च अदालतले सुनाएको फैसलाप्रति डा. बाबुराम भट्टराईले आपत्ति जनाएका छन् ।

आठजनाको ज्यान जाने गरी भएको टिकापुर हत्याकाण्डका दोषी चौधरीले जिल्ला र उच्च अदालतको फैसलाविरुद्ध सर्वोच्चमा पुनरावेदन दिएपनि सर्वोच्चले मंगलबार उच्चकै फैसला सदर गरेपछि नेपाल समाजवादी पार्टीका अध्यक्ष समेत रहेका डा. भट्टराईले आपत्ति जनाएका हुन् ।

‘अदालत र न्यायाधीशले पुराना/विद्यमान कानून, नजीर, सोंच राखेर ‘अपराध’ को परिभाषा गर्छन् र ‘अपराधी’ लाई दण्ड सुनाउछन् । क्रान्तिकारीले पुरानो/विद्यमानसंग विद्रोह गरेर नयाँ/भविष्यमुखी सोंच/मान्यता/विधि स्थापित गर्न खोज्छन् र पुरानाको नजरको ‘अपराध’ गरिरहन्छन्,’ डा. भट्टराईले सामाजिक संजाल ट्विटरमा लेखेका छन्, ‘इतिहासमा यो अन्तरविरोध निरन्तर चलिरहेको छ र चलिरहनेछ । रेशम चौधरी क्रान्तिकारी हुन् सलाम !!’