हामी सबैकाे संसारन्यूज

काठमाडौं । सर्वोच्च अदालतले जिल्ला र उच्च अदालतको फैसला सदर गर्दै रेशम चौधरीलाई जन्मकैदको फैसला सुनाएपछि नागरिक उन्मुक्ति पार्टी विरोधमा देखिएको छ । उन्मुक्ति पार्टीले चौधरीको रिहाइको माग गर्दै आन्दोलनको घोषणा गर्ने चेतावनी दिएको छ ।

उन्मुक्ति पार्टीले आवश्यक परे नेपाल बन्दसम्म गर्ने चेतावनी दिएको छ । बुधबार पत्रकार सम्मेलन गर्दै उन्मुक्तिका वरिष्ठ उपाध्यक्ष दामोदर पण्डितले चौधरीको रिहाइ र लाल आयोगको प्रतिवेदन सार्वजनिक हुनुपर्ने बताए ।

उनले बताएअनुसार मागहरु पुरा नभए पाँच गतेदेखि देशैभरि प्रदर्शन र ६ गतेदेखि नेपाल बन्दको कार्यक्रम गर्ने तयारी भएको जनाए ।

आन्दोलनमा देखिएको उन्मुक्तिले माग पुरा नभएको खण्डमा सरकारलाई दिएको समर्थन पनि फिर्ता गर्ने बताएको छ । उन्मुक्ति पार्टीले तीन दिनभित्र आफ्ना माग सम्बोधन नभए समर्थन फिर्तासँगै आन्दोलन गर्ने बताए ।