हामी सबैकाे संसारन्यूज

काठमाडौं । चिनियाँ जनमुक्ति सेनाले छाउनीस्थित वीरेन्द्र अस्पतालका लागि अत्याधुनिक एमआरआई मसिन सहयोग गरेको छ ।

नेपाली सेनामा प्रविधिमा आधारित स्वास्थ्य उपचार सुविधाको विस्तारमा ठूलो उपलब्धि हासिल भएको नेपाली सेनाले जनाएको छ ।

जनबादी गणतन्त्र चीन सरकारबाट नेपाली सेनालाई सहयोग स्वरुप प्रदान गरिएको उक्त मेशिन नेपालका लागि चिनियाँ राजदूत छन सोङ र प्रधान सेनापति प्रभुराम शर्माले एमआरआई मेशिन जडित कक्षको संयुक्तरुपमा उद्घाटन गरेका हुन् ।

उक्त कार्यक्रममा प्रधान सेनापति प्रभुराम शर्माले नेपाली सेनाको स्वास्थ्य उपचार क्षेत्रमा चीन सरकार तथा चिनियाँ जनमुक्ति सेनाले पु¥याएको योगदानका लागि आभार व्यक्त गरेका थिए ।

नेपाली जनता तथा चिनियाँ जनताहरुबीच रहँदै आएको युगौं पुरानो सुमधुर सम्बन्धका बारेमा उल्लेख गर्दै शर्माले सन् २०१५ को विनासकारी भुकम्प पश्चातको उद्धार तथा पुनःनिर्माण प्रयासहरुका साथै कोभिड–१९ महामारी विरुद्धका प्रयासहरुमा चीनबाट प्राप्त सहयोग नेपाली जनता तथा नेपाली सेनाका लागि स्मरणीय रहने बताए ।

कार्यक्रममा चिनियाँ राजदूत छन् सङले नेपाल, सदैव चीनको एक असल छिमेकीका रुपमा रहेको बताउँदै नेपाली सेनाको स्वास्थ्य उपचार क्षेत्रको सुधारमा सहयोग गर्न पाएकोमा खुसी व्यक्त गरेका थिए ।

उनले दुई देशका जनता तथा सरकारहरु बीचको सम्बन्ध सुमधुर रहेको तथा भविष्यमा पनि रहिरहने विश्वास समेत गरेका थिए ।

उक्त कार्यक्रममा बलाधिकृत रथी, नेपाली सेनाका रथीवृन्द तथा अधिकृतहरु लगायत चिनियाँ राजदूतावासका पदाधिकारी एवं चिनियाँ सैनिक सहचारीको उपस्थिती रहेको थियो ।