हामी सबैकाे संसारन्यूज

काठमाडौं । गैरआवासीय नेपाली संघ (एनआरएनए) यूकेको पहलमा नक्कली भुटानीको ’लिष्ट’ तयार गर्न लागिएको छ ।

नेपालमा नक्कली भुटानी प्रकरणमा नेता, कर्मचारीहरुको नाम एकाएक आउने क्रम जारी रहेको र केही उच्च पदस्थहरु समेत पक्राउ परिरहेका बेला बेलायतमा समेत यसप्रति चासो देखाउँदै नक्कली भुटानी शरणार्थीको खोजी गरिएको बताइएको छ ।

बेलायतको आवासीय अधिकार लिनकै लागि आफूलाई भुटानी भनेका नेपालीहरुको लिष्ट तयार गरिन लागिएको र उक्त लिष्टमा गैरआवासीय नेपाली संघका केन्द्रीय पदाधिकारीदेखि नेपाल पत्रकार महासंघ बेलायतका पूर्वअध्यक्ष, केही राजनीतिक पार्टीका नेता, गायन पेशामा आवद्ध व्यक्ति, युरोपकै पुरानो नेपाली संस्था यती एसोसिएसन यूकेमा महत्वपूर्ण पदमा बसिसकेका व्यक्ति समेत रहेको एनआरएनएका प्रवक्ता भरतमणि चोङवाङले बताएका छन् ।

’बेलायत बस्नकै लागि भुटानी शरणार्थी बनेर सार्वभौम स्वतन्त्र देशको बद्नाम गर्ने, जन्मभूमिप्रति घृणा फैलाउने र ब्रिटिश सरकारको आंखामा छारो हालेर गैरकानूनी काम गर्नेहरु सजायको भागिदार बन्नु पर्छ भनेर हामीले यस मुद्दालाई एनआरएनए यूकेले अगाडि बढाएका छौं ।’ एनआरएनए बेलायतले भनेको छ ।

यसैबीच, एक नक्कली भुटानीकै आयोजनामा आउंदो २१ मे आइतबार लन्डनमा हुने भनिएको एक अवार्ड कार्यक्रम वहिष्कार गर्न एनआरएनए यूकेले आव्हान समेत गरेको छ ।

’होम अफिसको रेकर्डमा नक्कली भुटानी तर आफूलाई वरिष्ठ पत्रकार भन्ने नेपाल पत्रकार महासंघ बेलायतका पूर्व अध्यक्षले चन्दा उठाउंदै गर्न लागेको अवार्ड कार्यक्रम समस्त बेलायती डायस्पोराकै लागि लज्जाको विषय हो,’ संघले भनेको छ, ‘त्यस्तो कार्यक्रममा गएर, सम्मानको खोस्टो बोकेर उल्टै आफ्नो उचाईं नघटाउन सबैमा अपिल गर्दछौं ।’