मुगु । मुगु जिल्लास्थित सोरु गाउँपालिकामा पहिलोपटक युवायुवतीलाई न्यायिक प्रशिक्षण तालिम संचालन गरिएको छ ।
‘हाम्रो समस्या हामै्र समाधान’ भन्ने मुल नारासहित सोरु गाउँपालिकाको आयोजना र जनअधिकार संरक्षण मञ्चको प्राबिधिकमा शनिबारदेखि सुरु गरिएको प्रशिक्षकमा पालिकाको १ देखि ११ वडाभित्रका ३० युवायुवतीलाई ८ दिने ४८ घण्टे न्यायिक प्रशिक्षण प्रारम्भ गरिएको छ ।
उक्त प्रशिक्षणमा मुख्य प्रशिक्षक लुम्बिनी प्रदेश नेपालगञ्ज उच्च अदालतका न्यायाधिश बामदेब ज्ञवाली र कानुन व्यवसायी सारदा अधिकारी रहेका छन् ।
प्रशिक्षण कार्यक्रमको पहिलो दिनमा मुगु जिल्ला अदालतका न्यायाधिश दिल कुमार बर्देवाले अदालतको न्याय भन्दा गाउँतिरको मेलमिलाप दिगो हुने बताए । गाउँघरका स–साना झै झगडा मिलापत्र गर्ने मुख्य काम न्यायिक समितिको रहेको बताउँदै उनले भने–ठूला फौजदारी अभियोगको फैसला गर्ने काम भने जिल्ला अदालतको हो ।
सबै स्थानीयतह वडास्तरमा न्यायिक समिति सक्रिय बनाउने व्यवस्था संबिधानको कानुनमै उल्लेख गरिएको प्रशिक्षक बामदेव ज्ञवाली भन्छन् । गाउँ बस्तीलाई शान्ति कायम गर्ने मुख्य जिम्मेवारी न्यायिक समितिको रहेको उनले भने ।
सोरु गाउँपालिकाको अघिल्लो ५ बर्षे कार्यकालमा ओझेलमा पारिएको न्यायिक समिति दोश्रो कार्यकालका जनप्रतिनिधिहरुले सक्रिय बनाई वडातहका झै–झगडा वडामै मिलापत्र गर्ने कामलाई पहिलो प्राथमिता दिएर न्यायिक समिति प्रभावकारी बनाउन खोजिएको छ ।
चार शब्दले बनेको मिलापत्रलाई सोरु गाउँपालिकामा प्रभावकारी बनाउन न्यायिक समिति सक्रिय बनाउन खोजिएका पालिकाका अध्यक्ष धर्मबहादुर शाही बताउँछन् । वडाका समान्य मुद्दा लिएर जिल्ला अदालत पुग्दा वादी र प्रतिवादीलाई धेरै खर्च र बढी दुःख भोग्नु परेको हुँदा त्यस्ता झगडा वडामै मिलापत्र गर्न न्यायिक समिति आबश्यक देखिएको उनको भनाई छ ।
गत फागुन २ गते न्यायिक समितिको बैठक बसेर सूचना जारी गरि वडा तहबाट न्यायिक समितिका सहकर्ता छनौट गरिएको न्यायिक समितिका संयोजक एबम् पालिका उपाध्यक्ष केशरबहादुर शाहीले भने । सूचना जारी गर्दा ६५ जनाको दरखास्त परेको र अन्तिममा ३० जना छनौट गरि न्यायिक प्रशिक्षकमा सहभागी गरिएको हो । अधिकांस सहजकर्ता पलसटु पास र केही एसईई रहेको उपाध्यक्षले बताए । पालिकामा अब घरदैलोको झगडा घरदैलोमै समितिले मिलापत्र गरि शान्ति कायम गर्ने आसा गरिएको छ ।
