हामी सबैकाे संसारन्यूज

काठमाडौं । नेपाली जनसम्पर्क समिति बहराइनले नक्कली भु्टानी शरणार्थी प्रकरणका आरोपिहरुलाई कुनैपनि राजनीतिक दल वा शक्तिको आडमा बचाउने प्रयास नगरियोस् भन्दै खबरदारी गरेको छ ।

समितिले अन्तराष्ट्रिय जगतमा मुलुकको मान प्रतिष्ठा र इज्जतमा नै कालो धब्बा लाग्ने गरी गरिएका यस्ता जघन्य अपराध (मानब बेचबिखन, ठगी र सरकारी कागजातको अपचलन) सम्बन्धी अनुसन्धानलाई प्रभाव पार्ने गरी सत्ता र शक्तिका आडमा दोषिलाई बचाउने कोशिष नर्गन खबरदारी गरेको हो ।

समितिका अध्यक्ष पदम सुन्दर गुरुङद्वारा जारी विज्ञप्तिमा छानबिनका लागि आवस्यक परेमा अन्तराष्ट्रिय अनुसन्धान विज्ञ टोली झिकाएर प्रकरणलाई टुंगोमा पुर्याउन समेत अनुरोध गरिएको छ ।

यसै प्रकरणमा संलग्नता रहेको भनि विभिन्न व्यक्तिको नाम आइरहेको सम्बन्धमा पनि समितिले ध्यानाकर्षण भएको जनाएको छ ।

‘बिना ठोस प्रमाण फरक राजनीतिक आस्थाको आधारमा बदनियतपूर्ण ढंगले विभिन्न व्यक्तिहरुको नाम सामाजिक संजाल, अनलाइन मिडिया, युट्युव लगायत केही राष्ट्रिय मिडियाहरु समेत संवेदनशीलताको ख्याल नगरि समाचारहरु प्रेशित गरी जनमानसमा भ्रम पैदा गर्ने र व्यक्तिको नैतिक पतन गराउने कुचेष्टा भएको हुँदा त्यस्ता सामाजिक संजाल प्रयोगकर्ता र अनलाइन मिडिया तथा युट्युवरलाई समाचारको श्रोत मागि कानुनी दायरामा ल्याउन पनि नेपाल सरकारसँग अनुरोध गर्दछ ।’ समितिद्वारा जारी विज्ञप्तिमा भनिएको छ ।