हामी सबैकाे संसारन्यूज

काठमाडौं । प्रहरीले नक्कली भुटानी शरणार्थी प्रकरणमाथिको अनुसन्धान प्रतिवेदन जिल्ला सरकारी वकिल कार्यालय काठमाडौंलाई बुझाएको छ। झण्डै दुई महिना लामो अनुसन्धानपछि सोमबार जिल्ला प्रहरी परिसर काठमाडौंले सरकारी वकिल कार्यालयलाई प्रतिवेदन बुझाएको हो ।

प्रहरीले आफ्नो प्रतिवेदनमा नक्कली भुटानी शरणार्थी प्रकरणमा ३३ जना संलग्न रहेको निष्कर्ष निकालेको छ । संलग्नमध्ये केहीलाई ठगी र संगठित अपराधसहित केहीलाई कीर्तेमा पनि मुद्दा चलाउन सिफारिस गरेको बुझिएको छ ।

साथै, प्रहरीले केहीमाथि अख्तियार दुरुपयोग अनुसन्धान आयोग र सम्पत्ति शुद्धीकरण अनुसन्धान विभागबाट पनि मुद्दा चलाउन सिफारिस गरेको बुझिएको छ ।

यस प्रकरणमा प्रहरीले १६ जनालाई पक्राउ गरेको छ भने बाँकी १६ जना फरार रुपमा रहेको प्रतिवेदनमा समावेश गरेको छ ।

काठमाडौं प्रहरी परिसरका प्रमुख एसएसपी दानबहादुर कार्कीले हालसम्म भेटिएका प्रमाणको आधारमा अनुसन्धान प्रतिवेदन बुझाएपनि थप व्यक्तिहरुमाथिको अनुसन्धान जारी रहने बताएका छन् । प्रहरीले यस प्रकरणमा थप अन्यको पनि संलग्नता हुनसक्ने आशंका गरेको छ ।

सञ्चारकर्मीसँगको कुराकानीमा उनले भनेका छन्, “अनुसन्धानको क्रममा वस्तुनिष्ठ कारण र तथ्य भेटिए फेरि पनि मुद्दा अघि बढ्छ, हामीले अनुसन्धानको काम अझै जारी राख्छौं ।”