हामी सबैकाे संसारन्यूज

काठमाडाैं । संस्कृति, पर्यटन तथा नागरिक उड्ययनमन्त्री सुदन किराँतीले आफू भारत भ्रमण नगएकाे बारे कारण खुलाएका छन् । मंगलबार काठमाडौंमा आयोजित एक कार्यक्रममा बाेल्दै किराँतीले दुई देशबीचमा उपलब्धिमूलक सम्झौता नहुने भएकै कारण आफू भारत भ्रमणमा नगएको बताएका छन् ।

‘हेलिकोप्टर को चढिएन ? भयो के ? यतिसम्म भयो कि ठूला व्यापारी, धनाढ्य घरानाकाले त उडाउने नै भए । कति हो कति हुँदो रहेछ, पर्यटन मन्त्रालय उड्नुपर्ने । ७० वटा जति देशबाट त निमन्त्रणा नै आयो । भ्रमण पनि जान्नँ भन्दिएँ । मैले हेलिकोप्टर पनि नचढ्ने दुई देशबीचको सम्झौता हुँदैन भने विदेश पनि नजाने । त्यसैले यसपालि इण्डिया पनि नगएको’, किराँतीले भनेका छन्, ‘खासमा पर्यटनमन्त्री त सवारीमन्त्री हो नि, जानुपर्थ्यो नि, तर गएर केही हुँदैन, आफ्नै भूमिका केही हुँदैन भने किन जाने ? ठूलो मान्छे भयो नभन्नुहोला, त्यहाँका मानिसले ।’

मन्त्री किराँतीले प्राकृतिक र मानव निर्मित नेपालीपन बोकेको पर्यटन प्रवर्द्धन मुख्य आवश्यकता भएको बताएका छन् । नेपाली पहिचान बाेकेका उत्पादनलाई बजारीकरण गरेर मात्रै देशकाे विकास हुने उनकाे भनाइ छ ।

उनले भने, “नेपाली पहिचान बोकेका गाउँघरका उत्पादन र स्वादलाई पर्यटनको विकास र प्रवर्द्धनमा जोड्नुपर्छ। मुलुक र जनताको हितमा काम गर्नुपर्छ भन्ने हुटहुटी र सहासले पर्यटन क्षेत्रमा देखिएको विकृतिलाई अन्त्य गर्दै प्रवर्द्धनका कार्यक्रम गर्न कोसिस गरिरहेको छु।”

कार्यक्रममा नेपाली कांग्रेसका सांसद रामहरि खतिवडाले मन्त्रीको जुहारीले कुनै पनि जिल्लाको विकास कम हुनु नहुने बताए । ओखलढुंगाको विकासका लागि आफूले अर्थमन्त्री र पर्यटनमन्त्रीसँग बारम्बार अनुरोध गरे पनि एकले अर्कोलाई दोष दिएर पन्छिएको उनको आरोप छ ।