काठमाडौँँ । हुलास स्टील–हिप्को सुपरबिल्ड स्टील फ्याब्रिकेशन तालिम तथा रोजगार कार्यक्रमको लागि आवेदन फाराम खुल्ला भएको छ । नेपालको श्रम बजारको प्रमुख चुनौतिलाई समाधान गर्न बेलायत सरकारद्वारा सहयोगार्थ रोजगारका लागि सीप कार्यक्रम अन्तर्गत नेपालको लुम्बिनी र मधेश प्रदेशमा तालिम तथा रोजगार कार्यक्रमको लागि आवेदन फाराम खुल्न भएको हो ।
उक्त कार्यक्रमले ४५ हजार नेपालीको जीविकोपार्जन उन्नत बनाउने काम गर्दै आईरहेको कम्पनीले बनाएको छ । उक्त कार्यक्रमलाई दिवाकर गोल्छा कर्पोरेशन अन्तर्गत हुलास स्टील उद्योग लिमिटेड र हिप्को सुपरबिल्डले संयुक्त रुपमा कार्यान्वयन गर्दै आईरहेको जनाइएको छ । नेपाल उद्योग परिसंघ र मेक ईन नेपाल (स्वदेशी) अभियानले साझेदारी गरेका छन् । यस कार्यक्रमले १ हजार ३४८ जनालाई श्रम बजारको माग अनुरुप तालिम र रोजगार दिन लागेको हो । तालिम सात दिनको रहने र तालिम बिरगंज महानगरपालिका–३१ बेलवा परसौनीस्थित हिप्को सुपरबिल्डको कारखानामा दिइने बताइएको छ ।
तालिम विशेष गरी स्टील/फलामका श्रमिक, महिला, अति निम्न आय भएका व्यक्ति र बिपन्न वर्गलाई लक्षित गरिएको छ । तालिममा नेपाली नागरिकता भएका र मधेश प्रदेश र लुम्बिनी प्रदेशमा स्थाई वा अस्थाई रुपमा बसोबास गरिरहेका सहभागी हुन सक्ने बताइएको छ ।
तालिम असारदेखि कार्तिकसम्म सञ्चालन गरिने बताइएको छ । तालिमले निर्माण र निर्माण सामग्री उत्पादन गर्ने निजी क्षेत्रका कलकारखानाहरुलाई आफ्नो व्यवसायको माग अनुसारको दक्ष कामदार प्रदान गर्ने बताइएको छ ।
वि.सं.२०८० असार ६ बुधवार ०८:३६ मा प्रकाशित






























