हामी सबैकाे संसारन्यूज

काठमाडौं । पूर्वप्रधानमन्त्री तथा नेपाल समाजवादी पार्टीका अध्यक्ष डा बाबुराम भटराईले प्रचण्डले घात गरेको कारण उदाउदै गरेका नया शक्तिसंग सहकार्य गर्नुपरेको खुलासा गरेका छन् । समाजवादी मोर्चाको बैठक बसेर कार्यक्रम घोषणा गरेको भोलीपल्ट बिहानै बाबुरामले यस्तो निर्णय लिएका छन् ।

उनले प्रचण्डको नामै नलिई उनलाई कडा दोष थोपरेका छन् ।

‘पुराना शक्तिहरूमा एकाधिकार जमाएर बसेका नेताहरूको वैचारिक–राजनीतिक विषयप्रतिको अरूची÷अनिच्छा र खालि तत्कालीन संसदीय अंकगणितप्रतिको अतिशय लिप्साको प्रतिफल स्वरूप हामीसंग कुनै परामर्श र छलफल विनै रहस्यमय ढंगले कथित ‘समाजवादी मोर्चा’ को एकतर्फी घोषणा हुनपुग्यो,’ उनले संजाल मार्फत भनेका छन्, नयाँ युगको नया ढंगको समाजवादवारे कुनै स्पष्ट सोच नभएको र सिर्फ अंकगणितका आधारमा कांग्रेस र एमालेसंग पालैपालो मोलमोलाइ गरेर सत्तादोहन गर्ने मात्र त्यसको आशय देखिएकाले त्यसमा हामी संलग्न हुने प्रश्नै उठेन । किनकि त्यो समाजवादको उदात्त ध्येयप्रति नै ठुलो घात हो । ’

प्रचण्डसंगको पछिल्लो सहकार्य अन्त्य भएको संकेत समेत गरेका छन् । ‘धेरै शुभेच्छुकहरू विशेषतः माओवादी आन्दोलनमा लागेका साथीहरूले हामीलाई आफैंले अघि सारेको समाजवादी केन्द्र वा समाजवादी मोर्चाबाट किन अलग भएको भनेर र अन्य कतिपयले तपाईं पुराना शक्तितिर कि नया शक्तितिर भनेर निरन्तर प्रश्न गरिरहनुभएकाले आफ्नो दृष्टिकोण सार्वजनिक गर्नु आवश्यक भएको छ’ उनले यसैमा भनेका छन् ‘नेपालमा संविधानसभाबाट समाजवाद–उन्मुख संघीय लोकतान्त्रिक गणतन्त्रको संविधान जारी भएपछि ती उपलब्धीहरूको रक्षा गर्दै सुशासन र समृद्धिको जगमा समुन्नत समाजवाद निर्माण गर्न नया ढंगको समाजवादी केन्द्र वा समाजवादी मोर्चा आवश्यक छ भन्ने प्रस्तावना हामीले अघि सारेकै हो । सकेसम्म पुराना शक्तिहरूको रूपान्तरणबाटै त्यस्तो शक्ति बन्नसके सहज हुन्छ भन्ने इमान्दार प्रयत्न हामीले गरेकै हो । त्यसनिम्ति गम्भीर प्रकृतिको वैचारिक–राजनीतिक छलफलको आग्रह पनि गरेकै हो ।’

कुन कित्तातिर भन्ने सवालको जवाफ दिंदै उनले भनेका छन ‘जहासम्म हामी नया शक्तितिर कि पुरानो शक्तितिर भन्ने प्रश्न छ, हामी नै वास्तवमा वैचारिक रूपले गत एक दशकदेखि देशमा नया वैकल्पिक राजनीति.शक्तिका प्रमुख प्रवर्तक भएकाले हामी नया वैकल्पिक शक्ति निर्माणकै पक्षमा रहेको र रहने कुरा स्वतः स्पष्ट छ ।’

जसपा अध्यक्ष उपेन्द्र यादवकै कारण मोर्चामा बस्ने अवस्था नरहेको भनिएका बाबुरामले उपेन्द्रप्रति पनि झटारो हान्दै भनेका छन् ‘वीचमा केही क्षेत्रीयतावादी शक्तिहरूसंग सहकार्य गर्दा हाम्रो छवी जनसमक्ष धमिलिन पुगेको कुरालाई स्वीकार्दै हामीले आत्मालोचना सहित त्यसलाई सच्याउने कार्य गरिसकेका छौं ।’

यसैगरी बाबुरामले अब पुराना राजनीतिक शक्तिको भरोसा र सहकार्य नहुने बताउदै नाम नलिइकनै रवि लगायतका उदाउदै गरेका शक्तिसंग सहकार्य गर्ने बताएका छन् । उनले भनेका छन ‘अतः नयाँ युगको र देशको आवश्यकता अनुरूप हामी देशमा उदाउदै गरेका सबै अग्रगामी नया शक्तिहरूसंग सहकार्य गर्दै वृहद नया वैकल्पिक शक्ति निर्माणमा प्रतिबद्ध रहेको र रहने कुरा द्विविधारहित ढंगले स्पष्ट पार्न चाहन्छौं ।’