हामी सबैकाे संसारन्यूज

काठमाडौं । नेकपा माओवादी केन्द्रका नेता तथा पूर्वसभामुख कृष्ण बहादुर महराले सुन तस्करसँग कनेक्सन रहेको भन्दै एक अनलाइन मिडियामा आएको समाचारको खण्डन गरेका छन् ।

नेता महराले असार ३० गते रातोपाटी डटकम अनलाइन समाचारमा प्रकाशित ‘सुन तस्करसँग पूर्व सभामु महराका बाउ छोराको कनेक्सन’ भन्ने समाचारप्रति आफुहरुको गम्भीर ध्यानाकर्षण भएको जनाएका छन् ।

‘चिनियाँ नागरिक वाङसँग पहिलेदेखि सामान्य चिनजान भएको र उनि आफु फलफुल व्यापारीको रुपमा नेपालमा रहँदै आएको जानकारी गराएका थिए । उनको अन्य व्यापार र कामसँग हाम्रो कुनै जानकारी र कुनै सम्बन्ध नरहेको स्पष्ट पार्न चाहान्छु ।’ महराद्वारा जारी विज्ञप्तिमा भनिएको छ ।

त्यसैगरी आफ्ना छोरा राहुल महराले भन्सार कर्मचारीलाई सम्पर्क गरिएको भनेर नाम जोडिएकोमा राहुलले चिनियाँ नागरिक वाङले चिनियाँ कामदारका लागि मगाएको कही सामान भन्सारमा अड्कीएको र बुझिदिन आग्रह गर्दा भन्सार कर्मचारीलाई सम्पर्क गर्दा नियम अनुसार हुने जानकारी पाएकोले त्यहि जानकारी गराएको विज्ञप्तिमा उल्लेख छ । ‘ती व्यक्तिसँग कुनै कार्यमा कुनै सहभागीता र सहयोग नगरेको पनि प्रष्ट पार्न चाहान्छौ ।’

महराले चिनजान हुनु र संलग्न हुनु फरक विषयलाई दुरासयपूर्ण तरिकारले समाचार प्रकाशित गर्नु ठिक नभएको भन्दै भनेका छन् –‘यो समाचार बिल्कुल तथ्यहिन मात्र नभएर राजनीतिक पूर्वाग्रहीको आधारमा भएकोले खण्डन गर्दछौं ।’