Sansar News
काठमाडौं । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आफ्नो सरकारले गरेका कामबाट जनतामा नयाँ आशा पलाएको बताएका छन् ।
पार्टी कार्यालय पेरिसडाँडामा आजदेखि सुरु भएको ‘जनतासँग माओवादी विशेष रूपान्तरण अभियान’ को भर्चुअल उद्घाटनका क्रममा ‘जनतासँग माओवादी विशेष रूपान्तरण अभियान’ बाट माओवादी पार्टी देशको सबैभन्दा ठूलो शक्ति बन्ने समेत बताए ।
अध्यक्ष प्रचण्डले आफ्नो नेतृत्वको सरकारले इतिहासकै राम्रो काम गरेको दाबी गर्दै राजनीतिक दल र तिनका नेतृत्वप्रति जनतामा रहेको निराशालाई आशामा परिणत गरेको समेत बताए ।
अध्यक्ष प्रचण्डले ललिता निवास प्रकरण, भुटानी शरणार्थी प्रकरण, सुन तस्करी प्रकरणलगायतका विभिन्न प्रकरणमा भएका निष्पक्ष छानबिन र कारबाहीले जनतामा उत्साह आएको बताउदैँ उनले भने, ‘जनतामा अब केही हुन्छ भन्ने आशाको रक्तसञ्चार गराएको छ ।’
उनले अभियानले पार्टीभित्र नयाँ वातावरणको सिर्जना गर्ने र जनतासँगको सम्बन्ध बलियो बनाउने समेत बताएका छन् ।
उक्त अभियान अन्तर्गत जनताको घर–घरमा जाने र जनतालाई सुन्ने बताउँदै आएको माओवादीले यो अभियानलाई अन्तिम परीक्षाको रुपमा लिएको छ ।
वि.सं.२०८० भदौ १६ शनिवार १०:२२ मा प्रकाशित
