हामी सबैकाे संसारन्यूज

काठमाडौं । आफ्ना श्रीमान चेतन प्रधानको हत्या अभियोगमा जेलमा रहेका योगराज ढकाल (रिगल)लाई सरकारले आम माफी दिएपछि उनकी श्रीमती भारती मानन्धरले अनशन सुरु गरेकी छन् ।

संविधान दिवसको अवसर पारेर सरकारको सिफारिसमा राष्ट्रपतिद्वारा आम माफी पाएपछि रिहा भएका रिगलको कैद मिनाहाविरुद्ध भारतीले अनशन सुरु गरेकी हुन् । भारतीले बुधबार बिहानदेखि अनशन बस्दै सरकारबाट आफूले न्याय नपाएसम्म घर नफर्किने पत्रकाहरुसमक्ष बताइन् ।

‘म मर्न तयार छु तर न्याय नपाएसम्म घर फर्किन्न ।’ भारतीले पत्रकारहरुसँग भनिन् । उनले रिगललाई पुनः जेल चलान गर्नुपर्ने माग गर्दै अनशन बसेकी हुन् ।

२०७२ सालमा असार २८ गते नेपालगन्जको धम्बोजी चोकमा भारतीका श्रीमानमाथि खुँडा प्रहार गरी हत्या गरेको अभियोगमा जेल बसेका रिगललाई सरकारले संविधान दिवसको अवसर पारेर कैद मिनाहा गरिदिएको थियो ।

जिल्ला अदालत बाँकेका न्यायाधिश विष्णु सुवेदीको इजलासले २०७६ साल बैशाखमा रिगललाई हत्या अभियोगमा सर्वस्वसहित जन्मकैदको सजाय सुनाएको थियो भने घटनामा संलग्न अन्य १० जनालाई प्रकृति हेरेर १०–१० वर्षको सजाय सुनाएको थियो ।