Sansar News
काठमाडौं । नेपाली कांग्रेसका नेता डा. शेखर कोइरालाले नेपाली सेनामा गरिने राजनीतिक चलखेल स्वीकार्य नहुने बताएका छन् । उनले सहायक रथी यमबहादुर अधिकारीको पदावधि थप्ने निर्णयप्रति सामाजिक सञ्जालमा लेख्दै यस्तो बताएका हुन् ।
नेता कोइरालाले राष्ट्रिय सुरक्षासँग जोडिएको र राजनीतिबाट टाढा रहेको सेनामा हुने चलखेलले दुर्घटना निम्त्याउने उल्लेख गरेका छन् ।
‘नेपाली सेनाजस्तो राष्ट्रिय सुरक्षासँग जोडिएको र सधैं राजनीतिबाट अलग रहेको संस्थामा माओवादीको पूर्वलडाकुका लागि नियमको दुरुपयोग गर्ने चलखेल स्वीकार्य छैन,’ उनले लेखेका छन्, ‘सेनामा गरिने राजनीतिक चलखेलले दुर्घटना निम्त्याउने हुँदा यस्तो कार्य नगरौं । सम्बन्धित निकायहरुलाई यो कुराको हेक्का होस ।’
माओवादी सेनाबाट समायोजन भएर गएका सहायक रथी अधिकारीको चार वर्षे पदावधि सकिएपछि सरकारले तीन वर्ष थप्ने निर्णय गरेको थियो ।
वि.सं.२०८० असोज २८ आइतवार १०:३१ मा प्रकाशित
