हामी सबैकाे संसारन्यूज

काठमाडौँ । बाह्रखरी डट कमका अध्यक्ष तथा प्रधानसम्पादक प्रतीक प्रधानको अध्यक्षतामा अनलाइन मिडिया सञ्चालकले ‘डिजिटल मिडिया सोसाइटी’ गठन गरेका छन् ।

आइतबार गठन भएको उक्त सोसाइटीको उपाध्यक्षमा सेतोपाटी डटकमका अध्यक्ष तथा प्रधानसम्पादक अमित ढकाल, महासचिवमा लोकान्तर डटकमका अध्यक्ष तथा सम्पादक विमल गौतम तथा कोषाध्यक्षमा क्लिकमान्डु डटकमका अध्यक्ष तथा प्रबन्धसम्पादक पुष्प दुलाल छन् ।

कार्यसमिति सदस्यमा देश सञ्चार डटकमका अध्यक्ष रविन दाहाल, रातोपाटी डट कमका सञ्चालक अर्जुन पन्त, शिलापत्र डट कमका सञ्चालक सुरेश सिम्खडा, हाम्रा कुरा डट कमका कार्यकारी निर्देशक माधवप्रसाद चम्लागाईं, विकास न्यूज डटकमका अध्यक्ष तथा प्रधानसम्पादक रामकृष्ण पौडेल, क्यापिटल नेपाल डट कमका सञ्चालक अनिता राजभण्डारी, नेपाल लाइभ डट कमका अध्यक्ष अनिल न्यौपाने छन् ।

संस्थाको पहिलो कार्यसमिति बैठकले हिमाल खबर डटकमका अध्यक्ष कुन्द दीक्षित तथा रातोपाटी डटकमका संस्थापक ओम शर्मालाई सल्लाहकारमा चयन गरेको छ । संस्थाको साधारण सदस्यमा नेपाल खबर डटकमका सञ्चालक तथा प्रधानसम्पादक पूर्ण बस्नेत छन् ।

डिजिटल मिडिया सोसाइटीमा आबद्ध संस्थाले पत्रकारिताको व्यावसायिकता तथा इमानलाई सम्बद्र्धन गर्ने विषयमा दृढता व्यक्त गर्दै आफ्नै आचारसंहितासमेत जारी गरेर सोअनुरूप मिडियालाई जिम्मेवार र अनुशासित बनाउने प्रण गरेको सोसाइटीले जारी गरेको विज्ञप्तिमा उल्लेख छ ।