हामी सबैकाे संसारन्यूज

काठमाडौं । नेपाल पत्रकार महासंघले पत्रकार प्रेम स्याङ्तानको निधनप्रति दुःख व्यक्त गरेको छ ।

महासंघ काठमाडौं शाखाका सदस्य ४२ वर्षीय स्याङ्तानका उपचारको क्रममा भएको असामयिक निधनको खबरले नेपाल पत्रकार महासंघ स्तब्ध र दुःखी भएको जनाएको छ ।
लामो समयदेखि मिर्गौला रोगबाट पीडित पत्रकार स्याङतानको उपचारत अवस्थामा बिहीबार सिनामंगलस्थित काठमाडौं मेडिकल कलेज (केएमसी) अस्पतालमा निधन भएको हो ।
विगत एक वर्षदेखि परिवारसहित नेपाल पत्रकार महासंघ केन्द्रीय कार्यालयको पत्रकार आवसगृहमा रहेर मिर्गौलाको डायलासिस र उपचार गराउँदै आएका थिए स्याङ्तान ।

वैदेशिक रोजगारीका सिलसिलामा रहँदा नेपाल पत्रकार महासंघ कतार शाखामा आवद्ध रही सहसचिवको जिम्मेवारी निर्वाह गरेका स्याङ्तानले स्वास्थ्य समस्याका कारण स्वदेश फर्किएर आफ्नो महासंघको सदस्यता काठमाडौं शाखामा स्थानान्तरण गरेका थिए । त्यस क्रममा उनले राजधानी दैनिकलगायतका पत्रपत्रिका काम गरेका थिए ।

पत्रकारिता क्षेत्रमा राम्रो पहिचान बनाएका स्याङतानकोे निधनले नेपाली पत्रकारिता क्षेत्रले एक जुझारु र ऊर्जाशील युवा पत्रकार गुमाउनुका साथै महासंघले सक्रिय सदस्य गुमाएको छ । स्वर्गीय स्याङतानका श्रीमती र दुई छोरीे छन् ।

‘महासंघ स्वर्गीय पत्रकार स्याङतानप्रति हार्दिक श्रद्धाञ्जली अर्पण गर्दै दिवंगत आत्माको चिरशान्तिको कामना गर्दछ । साथै, शोकको यस घडीमा शोकसन्तप्त परिवारजनमा धैर्यधारण गर्ने शक्ति प्राप्त होस भन्ने कामनासहित गहिरो समवेदना व्यक्त गर्दछ ।’ महासंघका महासचिव रोसन पुरीद्वारा जारी विज्ञप्तिमा उल्लेखछ ।